ნაციონალური მოძრაობის წევრმა, თამარ კორძაიამ საარჩევნო უბნებზე მათი წარმომადგენლების მიერ დაფიქსირებულ დარღვევებზე ისაუბრა. მისი თქმით, გამოვლინდა ბიულეტინების ჩაყრის, მარკირების დარღვევის, აგიტაციისა და კოვიდუბნების გაუმართაობის ფაქტები.

თამარ კორძაიას განცხადებით, ისნის 71-ე უბანზე კომისიის თავმჯდომარის მოადგილემ არაკანონიერად ჩაყარა ბიულეტინები საარჩევნო ურნაში. ადგილზე ენმ-ის წარმომადგენლებმა გამოიძახეს პოლიცია.

"ჩვენ ვითხოვთ ამ უბნის შედეგების გაბათილებასაც და ამ ფაქტის დამადასტურებელი ბევრი მოწმე არის უბანზე. ასევე, მოვითხოვთ ცესკოსგან, ამოიღოს ნებისმიერი კამერის ჩანაწერი, რომელიც იყო უბანზე და შეისწავლოს აღნიშნული ფაქტი. პოლიციას კი ვთხოვთ, დაიწყოს გამოძიება არჩევნების გაყალბებასთან დაკავშირებით", — განაცხადა კორძაიამ.

ამასთანავე, კორძაიამ ისაუბრა მარკირების წესის დარღვევასა და აგიტაციის შემთხვევებზე. მისი თქმით, გლდანის 34-ე, ვაკის 61-ე და 29-ე უბნებზე მარკირების სითხე არ ასრულებს თავის ფუნქციას და ამომრჩეველს ხელის დაბანისა და გაწმენდის შემდეგ სცილდება.

"საბურთალოს მე-80 უბანზე მარკირებულმა ამომრჩეველმა მისცა ხმა და ეს არის პირდაპირი მტკიცებულობა, რომ გაყალბებას ჰქონდა ადგილი. საბურთალოს 68-ე უბანზე შემაჯამებელ ოქმზე წინასწარ მოაწერეს ხელი კომისიის თავმჯდომარემ და თავმჯდომარის მოადგილემ. გლდანის პირველ უბანში ამომრჩეველს რეგისტრატორმა შემოახაზინა ბიულეტენი და უთხრა, რომ შემოეხაზა 41 ნომერი. შესაბამისად, ხმა მიაცემინა აგიტაციის შედეგად", — ამბობს კორძაია.

თამარ კორძაიამ აღნიშნა, რომ დაფიქსირდა ისეთი შემთხვევებიც, როდესაც კოვიდუბანზე რეგისტრირებულმა პირებმა ძირითად უბნებზე მისცეს ხმა.

"კრწანისის მე-12 კოვიდუბანზე შეყვანილმა ამომრჩევლებმა ხმა მისცეს ძირითად უბანში. იგივე მოხდა გლდანის 95-ე უბანზე, კოვიდუბანზე რეგისტრირებულმა ძირითად უბანზე მისცა ხმა", — თქვა კორძაიამ.

დღეს, 30 ოქტომბერს ადგილობრივი თვითმმართველობის არჩევნების მეორე ტური იმართება. მერი 15 თვითმმართველ თემსა და 5 თვითმმართველ ქალაქში, მათ შორის, თბილისში აირჩევა. გარდა ამისა, მეორე ტური გაიმართება 24 საარჩევნო ოლქში, რომლის შედეგად აირჩევა 42 მაჟორიტარი.

არჩევნების შესახებ ყველა სიახლეს შეგიძლიათ On.ge-ზე გაეცნოთ: