დეპუტატი ბექა ოდიშარია ამბობს, რომ თუ ვინმეს აგინეს, ე.ი. მან დაიმსახურა. ასე ეხმაურება ის ვაზისუბანში, 62-ე საარჩევნო უბანთან მომხდარ დაპირისპირებას. ოდიშარია ამბობს, რომ შემთხვევის ადგილას მეგობრებთან მივიდა და არ იცის რა მოხდა, თუმცა დარწმუნებულია, რომ მისი მეგობრები "უსამართლობას არასდროს არ გააკეთებენ".

"მოვედი ჩემს მეგობრებთან. ვინ, ვინ არის? აზრზე არა ვარ. არ ვიცი ვინ იგინებოდა. მოსთხოვეთ პასუხი, თუ აგინებდნენ, ე.ი. ვიღაცამ დაიმსახურა და აგინა. მე რა გავაკეთო, მთელი პოლიცია აქ არის, მთელი პოლიცია აქ არის, მე რა გავაკეთო [...] კარგად მომისმინე, ჩემს მეგობრებთან მოვედი, მაინტერესებს რა ხდება. ჩემი მეგობრები უსამართლობას არასდროს არ გააკეთებენ", — უთხრა ოდიშარიამ ჟურნალისტებს.

ვაზისუბნის 62-ე უბანთან ნაციონალური მოძრაობის თავმჯდომარესა და თბილისის მერობის კანდიდატს, ნიკა მელიას ფიზიკური შეურაცხყოფა მიაყენეს. როგორც კადრებში ვხედავთ, მედიასთან განცხადების გაკეთებისას მას უცნობმა პირმა თავში ხელი ჩაარტყა.

ადგილზე გამოჩდნენ ქართული ოცნების დეპუტატები. ოდიშარიას გარდა ადგილზე ვაზისუბნის 62-ე უბანთან ბექა დავითულიანი და გიორგი ამილახვარიც იმივიდნენ, რის შემდეგაც სიტუაცია დაიძაბა. იყო ფიზიკური დაპირისპირებაც. მობილიზებულია პოლიცია.

აღნიშნულ ინციდენტამდე ნიკა მელიამ თქვა, რომ უცნობმა ადამიანმა ფიზიკური ძალის გამოყენებით 10 ბიულეტენი ყუთში ჩაყარა და მიიმალა.

დღეს, 30 ოქტომბერს ადგილობრივი თვითმმართველობის არჩევნების მეორე ტური იმართება. მერი 15 თვითმმართველ თემსა და 5 თვითმმართველ ქალაქში, მათ შორის, თბილისში აირჩევა. გარდა ამისა, მეორე ტური გაიმართება 24 საარჩევნო ოლქში, რომლის შედეგად აირჩევა 42 მაჟორიტარი.