ქართული ოცნების თავმჯდომარის, ირაკლი კობახიძის თქმით, ექსპრეზიდენტი მიხეილ სააკაშვილის შიმშილობა "იმიტირებულია". მისი თქმით, ეს "შოუ" 30 ოქტომბრამდე გაგრძელდება, შემდეგ კი აქტუალობას დაკარგავს

"ჩვენ ვხედავთ, რომ არის რაღაცა შიმშილობის იმიტირებული ქრონიკა. მათ შორის იმის გამოც, რომ რეალურად ის, რასაც ჰქვია, არ შიმშილობს, იყო კონკრეტული ფაქტები, რაზეც იუსტიციის სამინისტრომ ისაუბრა და შესაბამისმა უწყებამ, ის იღებდა თაფლს, მედიკამენტური კუთხით მიიღო ვიტამინები და ა.შ.

ეს არის ზუსტად იმიტაცია, ეს იმიტაციაც იქნება აქტუალური 30 ოქტომბრამდე, ამის შემდეგ იმიტაციისთვისაც ინტერესი აღარ დარჩება. აქედან გამომდინარე, გვაქვს მოლოდინი, რომ 30 ოქტომბრამდე დარჩება ძალაში ეს შოუ, მაგრამ 30 ოქტომბრის შემდეგ ეს შოუ – შიმშილობის იმიტირებული ქრონიკა მთლიანად დაკარგავს თავის აქტუალობას", — თქვა კობახიძემ რუსთავი 2-ის ეთერში.

მიხეილ სააკაშვილი პირველ ოქტომბერს, მას შემდეგ დააკავეს, რაც სოციალურ ქსელში ვიდეო გაავრცელა, სადაც ჩანდა, რომ საქართველოში იმყოფებოდა. ის 27-ე დღეა შიმშილობს.

ექსპრეზიდენტის ექიმი და ადვოკატები მის სათანადოდ აღჭურვილ სამოქალაქო კლინიკაში გადაყვანას ითხოვენ. მათი თქმით, პენიტენციური სამსახურის მე-18 სამედიცინო დაწესებულება არ არის აღჭურვილი იმ აპარატურით, რაც საჭიროა მიხეილ სააკაშვილის ჯანმრთელობის მონიტორინგისა და მკურნალობისთვის.

მისი პირადი ექიმის, ნიკოლოზ ყიფშიძის განცხადებით, სააკაშვილი გლდანის ციხეში მკურნალობის კატეგორიულად წინააღმდეგია. ექიმის ცნობით, კონსილიუმი თანხმდება, რომ საჭიროების შემთხვევაში, ექსპრეზიდენტი მრავალპროფილურ, მაღალი კლასის კლინიკაში უნდა გადაიყვანონ.

სახალხო დამცველიც მიიჩნევს, რომ ციხის საავადმყოფო სრულად არ შეესაბამება ექიმთა კონსილიუმის რეკომენდაციებს და ამასთან, არსებობს რისკები ექსპრეზიდენტის უსაფრთხოებაზეც.

ჯანდაცვის მინისტრის, ეკატერინე ტიკარაძის მტკიცებით, მიუხედავად იმისა, რომ მე-18 სამედიცინო დაწესებულებას არ აქვს გადაუდებელი მიღების შესაძლებლობა, ის სრულადაა აღჭურვილი იმისთვის, რომ საჭიროების შემთხვევაში, მიხეილ სააკაშვილი მიიღოს. იგივე პოზიცია აქვს იუსტიციის სამინისტროსაც.

პრემიერმინისტრი ირაკლი ღარიბაშვილი კი ამტკიცებს, რომ სააკაშვილს აქვს "ილუზიები", თითქოს კერძო კლინიკაში გადაყვანის შემთხვევაში, 30 ოქტომბერს მისი მხარდამჭერები მობილიზდებიან და გაათავისუფლებენ. რაც შეეხება სააკაშვილის კერძო საავადმყოფოში გადაყვანას, ღარიბაშვილი აცხადებს, რომ ციხის საავადმყოფოში ყველა პირობა არის შექმნილი და ეს გადაწყვეტილება "არ გადაიხედება".