ქუთაისის მერობის კანდიდატის შემდეგ, მთავარ არხს სასამართლოში ჭიათურისა და ქარელის მერობის კანდიდატებიც უჩივიან. ქართული ოცნების მერობის კანდიდატები ტელეკომპანიას მათ შესახებ დეზინფორმაციის გავრცელებაში სდებენ ბრალს და კომპენსაციის სახით სიმბოლურ თანხას, 55 555 ლარს ითხოვენ.

"ჩემი ოჯახის მიმართ, ჩემ მიმართ განახორციელეს უპრეცედენტო ზეწოლა, გამოგონილი ამბებიდან, რომელიც არ შეესაბამება სიმართლეს [...] ჩემმა ოჯახმა, ჩემმა შვილმა, 11 წლის შვილმა განიცადა ტიპური ბულინგი ამ ამბების მოსმენის შემდეგ. დედაჩემი, რომელიც ძალიან მძიმედ დაავადებულია, ახლაც საავადმყოფოში იმყოფება.

მოვამზადეთ სარჩელი. დღევანდელ დღეს შედის თბილისის საქალაქო სასამართლოში, პატივისა და ღირსების შეურაცხყოფისათვის. ჩვენ ვითხოვთ სიმბოლურ თანხას, 55 555 ლარს, რომელიც ბავშვთა ფონდში გადაირიცხება", — განაცხადა ჭიათურის მერობის კანდიდატმა, გივი მოდებაძემ.

ქარელის მერობის კანდიდატის, ზაზა გულიაშვილის თქმით, მას სარჩელი უკვე შეტანილი აქვს.

"ჩვენი ქვეყნის მოსახლეობა ხედავს, რომ ეს ამორალური ადამიანები ცილისწამებასა და პირად შეურაცხყოფაზე არიან გადასულები, რაც არ უნდა შერჩეთ. ამ ყველაფერს სამართლებრივადაც დავადასტურებთ. სარჩელი შეტანილი გვაქვს, რათა პასუხი აგონ ამ უმსგავსობაზე და იმ სიძულვილის ენაზე, რაც ნაციონალური მოძრაობის ტელევიზიებიდან მოედინება", — ამბობს გულიაშვილი.

რამდენიმე დღის წინ მთავარ არხს, მის გენერალურ დირექტორს, ნიკა გვარამიას და ამავე ტელევიზიის ჟურნალისტს, ეკა გაგუას სასამართლოში უჩივლა ქართული ოცნების ქუთაისის მერობის კანდიდატმა, იოსებ ხახალეიშვილმა. ხახალეიშვილი მედიის წარმომადგენლებს პატივისა და ღირსების შემლახველი ინფორმაციის გავრცელებას ედავება.