წითელ ხალიჩაზე შვილებთან ერთად მისულმა ანჯელინა ჯოლიმ ფანებს გული აუჩუყა

სულ რამდენიმე დღის წინ ჰოლივუდის ვარსკვლავი, ანჯელინა ჯოლი, თავისი მონაწილეობით გადაღებული ფილმის, Eternals-ის, ლოს-ანჯელესში გამართულ პრემიერაზე თავის შვილებთან ერთად მივიდა. ფილმისადმი დიდი ინტერესის მიუხედავად, ჯოლის წითელ ხალიჩაზე გამოჩენამ ყურადღება იმით მიიქცია, რომ თავის ერთ-ერთ შვილს, ზაჰარას, დედის ძველი კაბა ეცვა, რომლითაც ანჯელინა 2014 წელს ოსკარების დაჯილდოებაზე გამოჩნდა.

ამჯერად, ოსკაროსანი ქლოა ჭაოს Eternals-ის ჩვენება რომის კინოფესტივალზე გაიმართა, ანჯელინა კი ღონისძიების წითელ ხალიჩაზე ისევ თავის ორ შვილთან — ზაჰარასთან და შაილოსთან — ერთად გამოჩნდა. ხელიხელჩაკიდებული სამეული კვლავ მედიისა და ფანების განსაკუთრებული ყურადღების ცენტრში მოექცა.

მიზეზი კი ალბათ ის არის, თუ როგორ თვალშისაცემად ჩანს ფოტოებზე დროის გასვლა. სულ რაღაც 4 წლის წინ, როცა ანჯელინა The Breadwinner-ის წითელ ხალიჩაზე მივიდა შვილებთან ერთად, შაილო და ზაჰარა ჯერ თინეიჯერებიც არ იყვნენ, ახლა კი დედას კოლეგებივით უმშვენებდნენ გვერდს.