ცოტა ხნის წინ ცნობილი გახდა ჩიკაგოს საერთაშორისო კინოფესტივალის 57-ე გამოშვების გამარჯვებულები და მათ შორის ქართული ფილმიც მოხვდა: ალექსანდრე კობერიძის ფილმს რას ვხედავთ, როდესაც ცას ვუყურებთ? საუკეთესო სცენარისთვის ვერცხლის ჰიუგო გადაეცა.

აღსანიშნავია, რომ გამარჯვებულებს შორის ასევე არიან წლევანდელი კანის კინოფესტივალის მონაწილე ისეთი ცნობილი ფილმები, როგორებიცაა რიუსუკე ჰამაგუჩის მანქანის მართვისას (Drive My Car) და აპიჩანტონგ ვერასეტაკუნის ხსოვნა (Memoria).

გამარჯვებულების სრული სია შეგიძლიათ იხილოთ ამ ბმულზე.

აღსანიშნავია, რომ რას ვხედავთ, როდესაც ცას ვუყურებთ? წელს ბერლინალეს საკონკურსო პროგრამაშიც იყო წარმოდგენილი: ამით ის თითქმის ბოლო 30 წლის განმავლობაში პირველი ქართული კინოსურათი გახდა, რომელიც ბერლინალეს საკონკურსო პროგრამაში მოხვდა — მას შემდეგ, რაც 1993 წელს თემურ ბაბლუანის ფილმს უძინართა მზე ვერცხლის დათვი გადაეცა, ბერლინის საერთაშორისო კინოფესტივალის მთავარ საკონკურსო პროგრამაში ქართული ფილმი აღარ უჩვენებიათ

მართალია, ქართული ფილმი ბერლინალეს წლევანდელმა ჟიურიმ არ დააჯილდოვა, თუმცა სანაცვლოდ სწორედ ფიპრესიმ დაასახელა ის ფესტივალის საუკეთესო კინოსურათად.

ალექსანდრე კობერიძის ეს მეორე სრულმეტრაჟიანი ფილმი ქართულ-გერმანული პროექტია, რომლის სცენარიც ლიზას და გიორგის სიყვარულის ისტორიას მოგვითხრობს და სიუჟეტი ქალაქ ქუთაისში ვითარდება. სამსახიობო გუნდის წევრები გიორგი ბოჭორიშვილი, ანა ქარსელაძე, ოლიკო ბარბაქაძე, გიორგი ამბროლაძე და ვახტანგ ფანჩულიძე არიან.