ექსპრეზიდენტ მიხეილ სააკაშვილის გათავისუფლების მოთხოვნით, 15 ადამიანი სარფიდან ბათუმამდე ფეხით მიემართება. როგორც On.ge-ს ამ აქციის მონაწილემ, ნათათო გიორგაძემ უთხრა, მათ გზად გაიარეს ბათუმის აქციაზე, ახლა კი მახინჯაურში იმყოფებიან, სადაც ღამეს კარვებში გაათენებენ და დილით გზას ისევ გააგრძელებენ.

"სოლიდარობას ვუცხადებთ საქართველოს მესამე პრეზიდენტს, მიხეილ სააკაშვილს. რადგან მისი პროტესტის ფორმა უკიდურესია და შიმშილობს, ჩვენ, ახალგაზრდებმა გადავწყვიტეთ, რომ უპრეცედენტო ფეხით მსვლელობით დავუჭიროთ მხარი და მოვითხოვოთ მისი გათავისუფლება. ეს არის ჩვენი მთავარი მიზანი: თავისუფლება მიხეილ სააკაშვილს", — ამბობს ის.

მისივე ინფორმაციით, ამ აქციაში მონაწილეობენ ორგანიზაციები ჩვენ გავათენებთ და ალტერნატივა. გიორგაძე ამბობს, რომ რაოდენობა, შესაძლოა, 20-მდე გაიზარდოს, თუმცა წინასაარჩევნო პერიოდის გამო გადაწყვიტეს, რომ ბევრი ადამიანი არ წავიდეს.

მიხეილ სააკაშვილი პირველ ოქტომბერს დააკავეს. ის დაკავების დღიდან, 23 დღეა შიმშილობს. ჯანდაცვის სამინისტროს ბაზაზე შექმნილმა ექიმთა კონსილიუმმა მისი პროფილაქტიკური ჰოსპიტალიზაციის რეკომენდაცია გასცა. ჯერჯერობით უცნობია, როდის და სად გადაიყვანენ სააკაშვილს დამატებითი გამოკვლევებს ჩასატარებლად.