ქართული ოცნება არასამთავრობო ორგანიზაცია პლატფორმა 20/20-სა და 19 სხვა NGO-ს ოპოზიციზიასთან თანამშრომლობაში ადანაშაულებს. საპარლამენტო უმრავლესობის წევრის, გივი მიქანაძის განცხადებით, აქედან 15 აფილირებულია ნაციონალურ მოძრაობასთან, 3 — ევროპულ საქართველოსთან, 2 — პარტია საქართველოსთვის.

"ორიოდე დღის წინ მთელი საზოგადოება გახდა მოწმე, როგორ წარადგინა ვასილ ურუშაძე ნიკანორ მელიამ თავისი გუნდის წევრად და თბილისის მერიაში ერთ-ერთი მნიშვნელოვანი სამსახურის ხელმძღვანელობის კანდიდატად. ამით დადასტურდა, რომ ბატონი ურუშაძე და პლატფორმა 20/20, რომელიც როგორც 2020 წლის, ასევე, 2021 წლებში გამოირჩეოდნენ არჩევნების მადესკრიდიტირებელი კამპანიის წარმოებით და ისინი არიან პირდაპირ დაკავშირებულნი ერთიან ნაციონალურ მოძრაობასთან", — აცხადებს მიქანაძე.

მიქანაძე არ გამორიცხავს, რომ პლატფორმა 20/20-ის საქმიანობა უკანონო შემოწირულობად იყოს განხილული. შესაბამისად, ის ადგილობრივ და საერთაშორისო ორგანიზაციებს აღნიშნული ფაქტით დაინტერესებისკენ მოუწოდებს.

ის, ასევე, მოითხოვს პლატფორმა 20/20-მა საჯარო წარმოადგინოს დაფინანსების წყარო, რომლითაც მათ არჩევნებზე მონიტორინგი და პროექტი ხმის მცველი განახორციელეს.

სამოქალაქო პლატფორმა 20/20-ის თავმჯდომარე ვასილ ურუშაძე On.ge-სთან აცხადებს, რომ ის კოალიციაში როგორც ტრანსპორტის სფეროს სპეციალისტი და ექსპერტი წარადგინეს. ვასილ ურუშაძის თქმით, ეს ნაციონალური მოძრაობის წევრობას და პარტიულ საქმიანობას არ ნიშნავს.

"ყველამ კარგად იცის, რომ 7 წელია, დაახლოებით, ტრანსპორტის სფეროში ვმოღვაწეობ. სწორედ გივი მიქანაძის დამსახურებაა, რომ ჩვენი არასამთავრობო ორგანიზაცია დღეს იმყოფება ზეწოლისა და შეიძლება ითვას, ტერორის ქვეშ. ჩვენ დაფინასნება არ გვაქვს, და გვაქვს სერიოზული პრობლემა გარკვეულ დონორებთან, რადგან ყოველთვიურად ქართული ოცნება მათ წერილებს წერს, რომ არ დაგვაფინანსონ", — ამბობს ურუშაძე.