ცოტა ხნის წინ გავრცელებული ინფორმაციით, მსახიობმა და პროდიუსერმა ალეკ ბოლდუინმა ნიუ-მექსიკოში ფილმ Rust-ის გადასაღებ მოედანზე სარეკვიზიტო იარაღი გაისროლა. გასროლის შედეგად ერთ-ერთი ოპერატორი გარდაიცვალა, ხოლო რეჟისორი დაიჭრა.

სანტა ფეს პოლიციის განცხადებით, ალეკ ბოლდუინი პოლიციაში თავისი ნებით გამოცხადდა, გამომძიებლების კითხვებს უპასუხა და შენობა დატოვა. ჯერჯერობით გამოძიება კვლავ მიმდინარეობს და ბრალი არავისთვის წარუდგენიათ.

"გამომძიებელთა თქმით, სარეკვიზიტო იარაღი მაშინ გაისროლეს, როცა მას ფილმის სცენის გადასაღებად იყენებდნენ. გამომძიებლები არკვევენ, თუ რა ტიპის ცეცხლსასროლი მასალაა გასროლილი", — წერია პოლიციის განცხადებაში.

42 წლის ოპერატორი, წარმოშობით უკრაინელი გალინა ხატჩინსი თავდაპირველად ვერტმფრენით საავადმყოფოში გადააფრინეს, თუმცა მედიკოსებმა მისი გარდაცვალება მალევე დაადასტურეს. დაჭრილი რეჟისორი ჯერჯერობით საავადმყოფოში რჩება.

"მსახიობები და ფილმის გუნდი დღევანდელი ტრაგედიით განადგურებულია და ჩვენ გალინას ოჯახსა და საყვარელ ადამიანებს ვუსამძიმრებთ. ფილმზე მუშაობა განუსაზღვრელი დროით შეჩერებულია და სანტა ფეს პოლიციის დეპარტამენტის გამოძიებასთან ვთანამშრომლობთ. ფსიქოლოგიურ კონსულტაციას გავუწევთ ყველას, ვინც ფილმის გადაღების პროცესთან იყო დაკავშირებული, რათა ამ საშინელი ტრაგედიის გადატანაში დავეხმაროთ", — აცხადებს Rust-ის წარმომადგენელი.