ნეტფლიქსის ახალი და სენსაციური წარმატების მქონე სერიალის, Squid Game-ის, იგივე კალმარის თამაშის, მსახიობის, იანგ-სუ ოს თქმით, განსახიერებულმა როლმა მისი ცხოვრება შეცვალა. ამის შესახებ მან სამხრეთკორეულ გადაცემაში სტუმრობისას ისაუბრა.

77 წლის იანგ-სუმ, რომელიც სერიალში მოთამაშე 001-ის როლს ასრულებს, მაყურებლების განსაკუთრებული სიყვარული დაიმსახურა. სასიკვდილო შეჯიბრების დაწყებამდე გაღიმებით იგი კალმარის თამაშის ერთ-ერთ ყველაზე ცნობილ სახედ იქცა. როგორც ჩანს, ფანების დამოკიდებულებას ოც გრძნობს და ეს ძალიან ახარებს.

"ასე მგონია, ცაში დავფრინავ", — ამბობს იგი, — "საკუთარ თავს ვეუბნები, უნდა დაწყნარდე, ფიქრები აკონტროლო და მიწაზე დაეშვა-მეთქი".

მსახიობმა ასევე აღნიშნა, რომ სერიალის მოტანილი პოპულარობა მისთვის იმდენად მოულოდნელი აღმოჩნდა, ასისტენტიც კი არ ჰყავს.

"უამრავი ადამიანი მიკავშირდება და რადგან მენეჯერი არ მყავს, ამდენ ზარსა და შეტყობინებასთან გამკლავება მიჭირს. ამიტომ, ჩემი შვილი მეხმარება.

"ბევრი რამ შეიცვალა. კაფეში ან მსგავს ადგილას რომ გავდივარ, უკვე მიწევს, ვიცოდე, როგორ გამოვიყურები. ეს მაფიქრებინებს, რომ პოპულარობაც რთული ყოფილა", — დასძენს იანგ-სუ.

ფოტო: Netflix

სულ რამდენიმე კვირის წინ გამოშვებული კალმარის თამაში, 111 მილიონი ნახვით ნეტფლიქსის ყველაზე პოპულარული სერიალად იქცა.

სერიალში სიუჟეტი იმ ადამიანების გარშემო ვითარდება, რომლებიც უფულობის გამო სასიკვდილო თამაშში ერთვებიან. აქ საბავშვო თამაშები სისხლიან შეჯიბრებადაა ქცეული, თუმცა საპრიზო თანხა მონაწილეებს თამაშის დატოვების ცდუნებას აძლევინებს.

კალმარის თამაშის რეჟისორს მისი შექმნის იდეა ჯერ კიდევ 2008 წელს გაუჩნდა, თუმცა, სანამ შეთავაზებას ნეტფლიქსი დათანხმდებოდა, სერიალის გადაღებაზე მას უარს 10 წლის განმავლობაში ეუბნებოდნენ.

ასევე იხილეთ: