სამხრეთ კორეაში უსამართლო სამუშაო პირობები Squid Game-ის კოსტიუმებით გააპროტესტეს

ოთხშაბათს სამხრეთ კორეაში უსამართლო სამუშაო პირობების გასაპროტესტებლად დაახლოებით 80 000 ადამიანი ქუჩაში გამოვიდა. დემონსტრაციის მონაწილეებმა ნეტფლიქსის სამხრეთ კორეული სერიალის, Squid Game-ის კოსტიუმები მოირგეს.

სამხრეთ კორეის პროფესიული კავშირების წევრები 13 ქალაქში, მათ შორის, დედაქალაქ სეულშიც გაიფიცნენ. ისინი სახელმწიფოსგან უკეთეს სამუშაო პირობებს ითხოვდნენ. მხოლოდ სეულში უსამართლო სამუშაო პირობების გასაპროტესტებლად დაახლოებით 27 000 დასაქმებული შეიკრიბა. მათ შეკავებას 12 000 პოლიციელი ცდილობდა.

Channel News Asia-ის კორეის განყოფილების ხელმძღვანელმა ტვიტერზე დემონსტრაციის ვიდეო გაავრცელა და დაწერა, რომ გაფიცულებს Squid Game-ის პერსონაჟებს მსგავსად ფინანსურად უჭირთ და არსებობისთვის ბრძოლა უწევთ.

Several union workers dressed in #SquidGames outfit take part in a rally in #Seoul, saying just like in the movie they too are struggling to make a living. They called on the government to improve workers’ rights. Some reports say about 30,000 took part in the rally. pic.twitter.com/tus8vj9KeG
— LIM Yun Suk (@yunsukCNA) October 20, 2021

ნეტფლიქსის სერიალში 456 ადამიანი ერთმანეთს სასიკვდილო თამაშებში ფულადი პრიზის მოსაგებად უპირისპირდება. თამაშების თითოეულ მონაწილეს ფინანსური პრობლემები აქვს, რაც, როგორც ჩანს, სამხრეთ კორეელების ნაწილისთვის უცხო სულაც არაა.

აღსანიშნავია, რომ სამხრეთ კორეაში კორონავირუსთან დაკავშირებული შეზღუდვების გამო 8-10 ადამიანზე მეტის შეკრება აკრძალულია. ვირუსის გავრცელების პრევენციის მიზნით პრეზიდენტმა გაფიცულებს დაშლისკენ მოუწოდა.