თუ თინეიჯერობის წლები Twilight-ის ვამპირული სიყვარულის ისტორიის ყურებაში გაატარეთ, აუცილებლად გეცოდინებათ, რომ ფილმის ვარსკვლავები — რობერტ პატინსონი და კრისტენ სტიუარტი რეალურ ცხოვრებაში ერთმანეთს 4 წლის განმავლობაში ხვდებოდნენ. რა თქმა უნდა, მსოფლიოს ყურადღების გარეშე არც მათ დაშორებას ჩაუვლია.

ამჟამად პატინსონი საზოგადოების ყურადღების ცენტრში The Batman-ის ახალი ფილმით მოექცა, რომელშიც ის პირქუში სუპერგმირის როლს ასრულებს. ბეტმენთან ერთად ფანებს მისი ერთ-ერთი მოწინააღმდეგის, ჯოკერის პერსონაჟიც ძალიან უყვართ. გულშემატკივრებმა გადაწყვიტეს, წლების შემდეგ რობერტ პატინსონისა და კრისტენ სტიუარტისთვის განსაკუთრებული შეხვედრა მოეწყოთ, რის გამოც უჩვეულო კამპანია წამოიწყეს. კამპანიით ფანები ითხოვენ, რომ რობერტ პატინსონის საპირისპიროდ ფილმში ჯოკერის როლი კრისტენ სტიუარტმა მოირგოს.

გამოცემა Variety-ს პოდკასტში სტუმრად მიწვეულ კრისტენს წამყვანმა კამპანიის შესახებ უთხრა და ჰკითხა, ჯოკერის როლის მორგებაზე რას ფიქრობდა. კრისტენს მტკიცე უარი არ უთქვამს, თუმცა აღნიშნა, რომ პერსონაჟის როლი აქამდე სხვებმა ძალიან კარგად შეასრულეს. მართალია, ჯოკერი მოსწონს, თუმცა იმავე ჟანრში სხვა როლის მორგება ურჩევნია.

"მოდი, რამე სხვა მოვიფიქროთ. დიდი სიამოვნებით ვითამაშებდი ახირებულ, საშიშ ადამიანს", — ამბობს კრისტენი.

აღსანიშნავია, რომ ჯოკერის როლი აქამდე ბევრ ცნობილ ადამიანს შეუსრულებია, რომელთა შორის არიან ჯეკ ნიკოლსონი, ჰიტ ლეჯერი და ხოაკინ ფენიქსი. ლეჯერმა და ფენიქსმა როლისთვის ოსკარიც კი მოიპოვეს.

რაც შეეხება თავად კრისტენ სტიუარტს, ის საზოგადოების ყურადღების ცენტრში ახალ ფილმში, სახელად Spencer პრინცესა დაიანას როლის დამსახურებით აღმოჩნდა. უამრავი ადამიანი კრისტენს როლისთვის ოსკარს უწინასწარმეტყველებს.

აშკარაა, რომ რობერტ პატინსონის ბეტმენს კრისტენ სტიუარტის ჯოკერი ახალ ფილმში ნამდვილად ვერ დაუპირისპირდება, ამიტომ მხოლოდ ჩვენი მდიდარი ფანტაზიით დაკმაყოფილება მოგვიწევს.

ამავე თემაზე: