ქართული ოცნების ქუთაისის მერობის კანდიდატ იოსებ ხახალეიშვილს ტელეკომპანია მთავარის, არხის გენერალური დირექტორის, ნიკა გვარამიას და ამავე ტელევიზიის ჟურნალისტის, ეკა გაგუას წინააღმდეგ სასამართლოში სარჩელი შეაქვს. ხახალეიშვილი მედიის წარმომადგენლებს პატივისა და ღირსების შემლახველი ინფორმაციის გავრცელებას ედავება. მისი თქმით, ერთ-ერთ გადაცემაში გავიდა სიუჟეტი, სადაც ის სუს-ის აგენტად მოიხსენიეს, რასაც მერობის კანდიდატი ტყუილს და ცილისმწამებას უწოდებს.

მერობის კანდიდატი შელახული ღირსების აღდგენისთვის 55 555 ლარს ითხოვს, რომელსაც მისივე თქმით, საქმის მოგების შემთხვევაში, საქველმოქმედო ფონდ ქუთაისში გადარიცხავს.

"ჩემი მოთხოვნაა, საჯაროდ უარყოფილ იქნას ცილისმწამებლური ინფორმაცია და იმავე მოპასუხეებს სიმბოლურად დაეკისროთ მორალური ზიანის ანაზღაურება 55 555 ლარის ოდენობით. საქმის მოგების შემთხვევაში, თანხა გადაირიცხება (ააიპ) საქველმოქმედო ფონდში ქუთაისი, რომლის ძირითადი საქმიანობა მძიმე კატეგორიის დაავადებულების დახმარებაა", — აცხადებს ხახალეიშვილი.

მისივე ინფორმაციით, "ტოტალური ტყუილებისა და შეურაცხყოფების წინააღმდეგ" სამართლებრივ ბრძოლას მმართველი პარტიის სხვა წევრებიც აპირებენ.