ჯანდაცვის მინისტრის მოადგილის, თამარ გაბუნიას განცხადებით, ჰოსპიტალიზაციის მაჩვენებელი ამ ეტაპზე 12%-ია, რაც მისი თქმით, შედარებით დაბალია, ვიდრე ეს წინა ტალღების დროს იყო. ამის შესახებ მან საკოორდინაციო საბჭოს სხდომაზე ისაუბრა.

"ეს გარკვეულწილად მიუთითებს იმას, რომ გამომდინარე ვაქცინაციის ფონიდან და ასევე, შესაძლოა, რომ შემთხვევები შედარებით მსუბუქია და ჰოსპიტალიზაცია საჭირო არ არის. თუმცა, ჰოსპიტალური სექტორი მობილიზებული რჩება", — განაცხადა მან.

მისი თქმით, დაახლოებით, 9 ათასამდე საწოლი, რომელიც ჯანდაცვის სექტორმა მეოთხე ტალღის დროს მოამზადა, ისევ რჩება მობილიზებული. გაბუნიას განცხადებით, აქედან, დაკავებულია 5 679 საწოლი. მისივე თქმით, ვაქცინაციის მაღალი მაჩვენებლიდან გამომდინარე, უფრო მეტად თავისუფალი საწოლები არის თბილისში და აჭარაში, ამიტომ ამ საწოლებს სხვა რეგიონებისთვის იყენებენ.