ქართული ოცნების თავმჯდომარე, ირაკლი კობახიძე ნაციონალურ მოძრაობას "თანამედროვე ბოლშევიკურ პარტია" უწოდებს, რომელიც მისი მტკიცებით, "რევკომების შექმნას შეეცდება" ყველა მუნიციპალიტეტში, სადაც "თეორიულად შესაძლოა", რომ არჩევნები მოიგონ.

"თქვენ გახსოვთ, რომ ნაცმოძრაობის იდეური წინამორბედები, წინაპრები ბოლშევიკები თავის დროზე ქმნიდნენ რევკომებს და ასეთი პატარა რევკომის შექმნას ისინი შეეცდებიან, რა თქმა უნდა, ყველა იმ მუნიციპალიტეტში, რომელიც თეორიულად, შეიძლება, მოიგონ. აქედან გამომდინარე, პრინციპულად მნიშვნელოვანია, რომ ჩვენ მოვიგოთ 20-ვე მუნიციპალიტეტში არჩევნები და არც მივცეთ ნაცმოძრაობას იმის საშუალება, რომ რაღაცა რევკომები ჩამოაყალიბონ. ნაცმოძრაობა არის თანამედროვე ბოლშევიკური პარტია, ეს არის სამწუხარო რეალობა", — თქვა კობახიძემ.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო.

ცენტრალური საარჩევნო კომისიის მონაცემებით, თვითმმართველობის არჩევნების მეორე ტური 20 მუნიციპალიტეტში გაიმართება. მეორე ტური ჩატარდება თბილისშიც.