დეპუტატი არმაზ ახვლედიანის თქმით, ცენტრალური საარჩევნო კომისიის ყოფილი თავმჯდომარეს, თამარ ჟვანიას ახალი თანამდებობა მისალოცი არ არის. რადგან მისალოცი, ვერ იქნება "ჩავარდნილი", "ჩაფლავებული" არჩევნები.

"ცენტრალური საარჩევნო კომისიის თავმჯდომარეს მიულოცეს, ნეტა მისალოცად იყოს საქმე, რა არის მისალოცი ჩავარდნილი, ჩაფლავებული, სამარცხვინო არჩევნები?", — თქვა ახვლედიანმა პარლამენტში პლენარულ სხდომაზე.

მანამდე დეპუტატმა გივი მიქაძემ ოპოზიციას ურჩია, რომ ჟვანიასთვის ბოდიშის მოეხადათ.

"როგორ ფიქრობთ, ძვირფასო ოპოზიციის წარმომადგენლებო, დანიშნავდა ეს ორგანიზაცია თავის წარმომადგენლად ადამიანს, რომელიც არჩევნებს გააყალბებდა? [...] მე თქვენს ნაცვლად შემრცხვებოდა და ახლა მაინც მოვუხდიდი ბოდიშს. მაგრამ ბოდიშის მოხდასაც უნარი უნდა, რომელიც სამწუხაროდ თქვენ არ გაგაჩნიათ", — თქვა მიქაძემ.

გუშინ, 18 ოქტომბერს ცნობილი გახდა, რომ ცენტრალური საარჩევნო კომისიის ყოფილი თავმჯდომარე, თამარ ჟვანია უზბეკეთში ამერიკული არასამთავრობო ორგანიზაციის, საარჩევნო სისტემების საერთაშორისო ფონდის (IFES) დირექტორად დაინიშნა.

თამარ ჟვანიამ საქართველოს საარჩევნო კომისიის თავმჯდომარის პოსტი 30 ივნისს დატოვა. ის აცხადებდა, რომ პოლიტიკაში წასვლას არ აპირებს და საქმიანობას საერთაშორისო ორგანიზაციაში გააგრძელებს. 2020 წლის ოქტომბრის არჩევნების შემდეგ ოპოზიცია ჟვანიას არჩევნების გაყალბების ხელშეწყობაში ადანაშაულებდა და მის გადადგომას მოითხოვდა. ამ მოსაზრებას არ იზიარებდნენ ქართულ ოცნებაში.