ცოტა ხნის წინ DC-მ ბეტმენის შესახებ გადაღებული ახალი ფილმის, The Batman-ის ტრეილერი გაავრცელა, რომელიც პირქუშ გმირებს, დაძაბულ ბრძოლებსა და დაუვიწყარ სანახაობას გვპირდება.

ახალი ტრეილერი ძველისგან ცოტათი განსხვავებულ ბეტმენს წარმოგვიდგენს, რომლის როლსაც რობერტ პატინსონი ასრულებს. ტრეილერით თუ ვიმსჯელებთ, პატინსონის ბეტმენი წინამორბედებთან შედარებით უფრო მრისხანე, პირქუში და შურისძიების სურვილით შეპყრობილია.

ახალ ტრეილერში ფილმის სხვა უმნიშვნელოვანეს პერსონაჟებსაც ვეცნობით, რომელთა შორისაცაა პინგვინი, ქალი-კატა და რიდლერი.

ტრეილერი რიდლერის დაკავებით იწყება. მართალია ვიცით, რომ მის როლს პოლ დანო ასრულებს, თუმცა ტრეილერში ბოროტმოქმედის სახე დაფარულია, რაც შესაძლოა რაიმე მოულოდნელ დეტალზე მიუთითებდეს.

ზოი კრავიცის ქალი-კატა სხვადასხვა პარიკში იმალება და ბეტმენის ნიღაბს ამოფარებული ადამიანითაა დაინტერესებული. ცნობილია, რომ წინა ფილმებისგან განსხვავებით, The Batman-ში ზოი კრავიცის პერსონაჟი სიუჟეტში უფრო მნიშვნელოვან როლს თამაშობს, რადგან კომიქსში ის ერთ-ერთი ცენტრალური ფიგურაა ბეტმენის ცხოვრებაში.

ფილმში პინგვინის როლს კოლინ ფარელი ასრულებს, რომელსაც ტრეილერში, ალბათ, ვერც კი იცნობდით. მართალია, მსახიობმა აღნიშნა, რომ მხოლოდ 5-6 სცენაში გამოჩნდება, თუმცა ტრეილერში მის პერსონაჟს საკმარისად დიდი დრო ეთმობა.

"თუ ასე გააგრძელე, მალე აღარაფერი დაგრჩება", — ეუბნება რობერტ პატინსონის ბეტმენს მისი ერთგული მსახური, რომლის როლსაც ენდი სერკისი ასრულებს.

"არ მადარდებს, რა მომივა", — ბეტმენის ამ პასუხში კარგად ჩანს მთავარი გმირისა და მთლიანი ფილმის განწყობაც, რასაც ახალი ტრეილერი მოწმობს.

The Batman-ის მსოფლიო პრემიერა 4 მარტსაა დაგეგმილი.