დღეს, 13 ოქტომბერს რუსთავი 2-ის საქმის დასკვნითი სხდომა გაიმართება. თბილისის საქალაქო სასამართლოში მხარეები მტკიცებულებებსა და საპაექრო სიტყვებს წარადგენენ.

დავით დვალისა და ჯარჯი აქიმიძის ადვოკატი, კახა კოჟორიძე აცხადებს, არსებობს საკმარისზე მეტი მტკიცებულება იმისთვის, რომ მათი სარჩელი დაკმაყოფილდეს.

"როგორც იურისტი სრული პასუხისმგებლობით ვამბობ, რომ ამ საქმეში არის საკმარისზე მეტი მტკიცებულება, არგუმენტი, გარემოება იმისათვის, რომ სარჩელი დაკმაყოფილდეს. ბევრად უფრო მეტი, ვიდრე ეს იყო 2015 წელს ქიბარ ხალვაშის სარჩელის შეტანის დროს. ყველა მტკიცებულება რაც საჭიროა იმაზე მეტი გვაქვს. ერთადერთი რაც ჩვენ გვჭირდება, მოსამართლის სამართლიანი პოზიციაა", — ამბობს კახა კოჟორიძე.

თავად დავით დვალის თქმით, მიუხედავად იმისა, რომ არ არის დარწმუნებული სასამართლოს მიუკერძოებლობაში, ოპტიმისტური მოლოდინი აქვს.

"მოლოდინი გვაქვს ოპტიმისტური, მიუხედავად იმისა, რომ არ ვართ დარწმუნებული სასამართლო რამდენად მიუკერძოებელი იქნება. წარვადგინეთ ყველანაირი მტკიცებულება, რომ გარიგება იყო უსამართლო და ზეწოლის ქვეშ მოხდა. მიუხედავად როგორ დამთავრდება დღევანდელი სხდომა და პროცესი, აუცილებლად მივყვებით ბოლომდე ამ საქმეს", — ამბობს დავით დვალი.

თბილისის საქალაქო სასამართლოში პროცესი ამ წუთებში მიმდინარეობს.

რუსთავი 2-ის საქმე

ბიზნესმენმა ქიბარ ხალვაშმა, რომელიც რუსთავი 2-ის საკონტროლო პაკეტს 2004-2006 წლებში ფლობდა, დავა ტელეკომპანიის დასაბრუნებლად 2015 წლის აგვისტოში წამოიწყო და ეს საქმე საქალაქო, სააპელაციო და უზენაეს სასამართლოებში 20 თვეში მოიგო. უზენაესი სასამართლოს საბოლოო გადაწყვეტილებით არხი ქიბარ ხალვაშს მიაკუთვნეს.

2004 წლის ზაფხულში, ხალვაშმა რუსთავი 2-ის 10%-იანი წილი ნიკა ტაბატაძისგან შეიძინა, 30%-იანი ეროსი კიწმარიშვილისგან და 60%-იანი ვინმე პაატა კარსანიძისგან. კარსანიძეს რუსთავი 2-ის საკონტროლო პაკეტი, მას შემდეგ ჩაუვარდა ხელში, რაც ხელისუფლების ზეწოლით, თავიანთი 30-30%-იანი წილები, ტელევიზიის დამფუძნებლებმა დავით დვალმა და ჯარჯი აქიმიძემ იძულებით გადაუფორმეს.

ხალვაში ტელეკომპანიას ორი წლის მანძილზე მართავდა. 2006 წელს, სააკაშვილსა და ოქრუაშვილის შორის მომხდარი ცნობილი დაპირისპირების შემდეგ, მას სხვა ბიზნესებთან ერთად რუსთავი 2-ც ჩამოართვეს. საბოლოოდ, 2011 წელს, კომპანიის მფლობელები შპს საქართველო და ყარამანიშვილები გახდნენ.

2016-2017 წლებში, საქართველოს სასამართლოებში გამარჯვების შემდეგ, ხალვაშმა განაცხადა, რომ ტელეკომპანიის 50%-ს, დავით დვალსა და ჯარჯი აქიმიძეს გადასცემს, როგორც წინა ხელისუფლებისგან დაზარალებულ აქციონერებს. მან დვალს ტელეკომპანიის დირექტორობაც შესთავაზა. თუმცა, ადგილობრივი და საერთაშორისო კრიტიკის შემდეგ, დვალმა განაცხადა, რომ ის რუსთავი 2-ში ცენზორად არ დაბრუნდება და ხელისუფლების მორჩილი, პარტიული ტელევიზიის წილები მას არ აინტერესებს.

ადამიანის უფლებათა ევროპული სასამართლოს გადაწყვეტილებით რუსთავი 2-ის 100%-იანი წილის მფლობელი ქიბარ ხალვაშია და საქართველოს სასამართლოებმა ყველა ინსტანციაზე კანონიერი გადაწყვეტილება მიიღეს. ამავე გადაწყვეტილებით გაუქმდა უზენაესი სასამართლოს საბოლოო გადაწყვეტილების აღსრულების შეჩერების დროებითი მექანიზმი. ამ მექანიზმით, 2017 წელს ქიბარ ხალვაშმა რუსთავი 2-ის წილები ვერ გადაიფორმა.