საქართველოს ყოფილი პრეზიდენტი და უკრაინის ოპოზიციური პარტიის ლიდერი, მიხეილ სააკაშვილი არასამთავრობოებს აკრიტიკებს და ამბობს, რომ მესამე სექტორს რუსეთის პრეზიდენტის, ვლადიმერ პუტინის მიერ დაქირავებული პიარ-სპეციალისტი იყენებდა მის წინააღმდეგ განცხადებების გასავრცელებლად:

"მთელი მსოფლიო პრესა აჭრელდა ინფორმაციით, რომ 2005 წელს პუტინმა იქირავა ცნობილი ამერიკელი PR სპეციალისტი პოლ მანაფორტი და მას, სხვა საქმეებთან ერთად, დაავალა ჩემს წინააღმდეგ მუშაობა საქართველოში, რისთვისაც ეს უკანასკნელი, თურმე, ქართულ არასამთავრობოებს იყენებდა. ახლა კი გასაგებია, თუ რატომ გვესხმოდა თავს მაშინ ყველა არასამთავრობო და რატომ არ იღებენ ხმას დღევანდელ მარაზმზე. ფული ბაბაია, დიდი ფული (თან, ჰოი საკვირველებავ, რუსული)".

არასამთავრობო ორგანიზაციებს 2016 წლის სექტემბერში აკრიტიკებდა ყოფილი პრემიერი ბიძინა ივანიშვილიც. გადაცემაში, "შეხვედრები რეგიონულ მედიასთან", ის ამბობდა, რომ მესამე სექტორს ნაციონალური მოძრაობა აფარებდა თავს:

"მესამე სექტორი დასვრილი და დაბინძურებულია, ისეთ ნიშას იფარებს ნაციონალური მოძრაობა, ისეთ ნიშაში შევიდნენ, რომ მასეთი აგრესიული ნაციონალური მოძრაობის წევრებიც არ არიან დღეს. ნაციონალური მოძრაობა არასამთავრობოებს აფარებს თავს. გიგაური მაგალითად, ფული რომ მიიღეს, რაღაც "პაგონები" გიგაურმაც მიიღო. მე მესამე სექტორს კი არ ვაკრიტიკებ, აქ თავშეფარებულ ხალხს ვაკრიტიკებ. გამოვიდნენ და ნუ აბინძურებენ ამ მესამე სექტორს. კეთილი ინებონ, და დაირქვან სახელი, რომელიც ეკუთვნით, ორმხრივ დანაშაულს ჩადიან, როგორც ლეიბორისტული პარტიაა, ფსევდოოპოზიციური. ლეიბორისტული პარტია ნაციონალურ მოძრაობაზე უარესია, იმიტომ რომ ეს მათი დამსახურებაა, ნაციონალური მოძრაობის წევრია და ამ დროს კიდევ ცრუობს, რომ იქ არ არის. ორმაგი დანაშაული გამოდის".