დროას ლიდერი ელენე ხოშტარია ექსპრეზიდენტ მიხეილ სააკაშვილის ჯანმრთელობის მდგომარეობის შესახებ გავრცელებულ ინფორმაციას ეხმაურება და აცხადებს, რომ წარმოუდგენელია და დაუშვებელია სიმპათია-ანტიპათიამდე დაიყვანო ის, რაც მესამე პრეზიდენტის გარშემო ხდება. მისი თქმით, განვითარებული მოვლენები სახელმწიფოს სირცხვილია.

"ქვეყანაში არ არსებობს სასამართლო, მთავრობა ღიად და დემონსტრაციულად ჩადის დანაშაულებს, ღვარძლის, სიძულვილის, დევნის, რევანშის, ძალადობის გარდა სათქმელი არაფერი აქვს მიტაცებულ სახელმწიფოში ოცნებას. და ამ დროს, ჩვენ, მძიმე ისტორიის მქონე ხალხი, ვმარჩიელობთ მოშიმშილე მესამე პრეზიდენტი რა კონდიციაშია. სახელმწიფოს სირცხვილია, რაც ხდება", — წერს ის.

ამ საკითხს გამოეხმაურა ლელოც, პარტიის განცხადებით, ყოფილი პრეზიდენტის, მდგომარეობის გაუარესების შემთხვევაში, პასუხისმგებლობა მთლიანად სახელმწიფოს დაეკისრება. ლელოს განცხადებაში ასევე ნათქვამია, რომ სააკაშვილის საქართველოში დაბრუნების დროსა და ფორმაზე, შესაძლოა განსხვავებული მოსაზრებები არსებობდეს, მაგრამ მისი ციხეში ყოფნა რთულ პოლიტიკურ რეალობას ქმნის.

10 ოქტომბერს, მიხეილ სააკაშვილის პირადმა ექიმმა ნიკოლოზ ყიფშიძემ თქვა, რომ სააკაშვილის მდგომარეობა დამძიმდა. როგორც ექიმი განმარტავს, ეს შიმშილობის გამო მოხდა და უჭირს საუბარი და მოძრაობა.

პენიტენციური სამსახური ექიმის განცხადებას გამოეხმაურა და ამტკიცებს, რომ ინფორმაცია იმაზე, რომ ექსპრეზიდენტის ჯანმრთელობის მდგომარეობა გაუარესდა, სიმართლეს არ შეესაბამება. მათი თქმით, როგორც მოშიმშილე, სააკაშვილი მუდმივად იმყოფება სამედიცინო პერსონალის დაკვირვების ქვეშ და მდგომარეობა დამაკმაყოფილებელია.

მიხეილ სააკაშვილი 10 დღეა შიმშილობს. სახალხო დამცველმა, ნინო ლომჯარიამ პირველ ოქტომბერს განაცხადა, რომ დაკავებული ექსპრეზიდენტი მიხეილ სააკაშვილი შიმშილობას აცხადებს.

7 ოქტომბერს სააკაშვილი პატრიარქის მდივანმა, მიქაელ ბოტკოველმა მოინახულა და გადასცა პატრიარქის თხოვნა, შეეწყვიტა შიმშილობა. მისი თქმით, სააკაშვილი უარზე იყო.

8 ოქტომბერს, სააკაშვილის ადვოკატმა, თქვა, რომ შიმშილობის გამო 12 კილოგრამი დაიკლო. 8 ოქტომბერს პენიტენციულმა სამსახურმა გაავრცელა ინფორმაცია, რომ სააკაშვილმა ციხის მაღაზიაში 7 ქილა თაფლი შეიძინა და დაწყებული აქვს საკვების მიღება. ამას უპასუხა სააკაშვილის ექიმმა და თქვა, რომ საკვებს არ იღებს, წვენი დალია და ფული აღარ აქვს, რომ მეტი წვენი შეიძინოს.