ქართული ოცნების დეპუტატი და პარლამენტის ვიცე-სპიკერი, გია ვოლსკი აცხადებს, რომ არსებობენ ისეთი ადამიანები, რომლებსაც პოლიტიკური მოგების მისაღებად სურვილი აქვთ ბათუმში კორპუსის ჩამონგრევას მსხვერპლი მოჰყვეს.

"არსებობს ადამიანთა დიდი ჯგუფი, რომლებიც ლოცულობენ, რომ იქ ნაკლები მსხვერპლი იყოს ან საერთოდ მსხვერპლი არ იყოს და არსებობენ ადამიანები, ვისაც სურვილი აქვთ, რომ ასეთი მსხვერპლი იყოს, რათა რაღაც პოლიტიკური დივიდენდი მიიღონ", — აცხადებს ვოლსკი.

დღეს, 8 ოქტომბერს, ბათუმში, 26 მაისის ქუჩაზე საცხოვრებელი კორპუსი ჩამოინგრა. მაშველები 11 საათზე მეტია ცდილობენ ნანგრევების ქვეშ მოყოლილი ადამიანების ამოყვანას. შინაგან საქმეთა მინისტრის, ვახტანგ გომელაურის ინფორმაციით, ნანგრევებში დაახლოებით 10-15 ადამიანი უნდა იყოს. ნანგრევებიდან უკვე გამოყვანილია ორი ადამიანი, ორივე ცოცხალია.

მსხვერპლის შესახებ ინფორმაცია, ჯერჯერობით, არ ვრცელდება. ამ დრომდე უცნობია ნგრევის მიზეზიც.

რამდენიმე საათის წინ, კლინიკიდან გაწერეს ბავშვი, რომელიც კორპუსის ნგრევისას მის წინ მდებარე მანქანაში იყო და ნანგრევებს შორის მოყვა. ბათუმის იაშვილის კლინიკის მთავარი ექიმის, თამარ ბახტაძის ინფორმაციით, წვივის ძვლის მოტეხილობა და ზედაპირული დაზიანებები აქვს.

გაიგე მეტი: