ოკუპანტებმა დღეს ერგნეთში გატაცებული სამი მოქალაქიდან ერთი გაათავისუფლეს. სახელმწიფო უსაფრთხოების სამსახურის ინფორმაციით, ის გორის ჰოსპიტალშია გადაყვანილი. დანარჩენი ორი მოქალაქის გათავისუფლებასთან დაკავშირებით მოლაპარაკებები გრძელდება.

გორის ჰოსპიტალში ექიმი ამბობს, რომ მისი მდგომარეობა სტაბილურია და მის სიცოცხლეს საფრთხე არ ემუქრება.

"პაციენტი შემოყვანილია სასწრაფო დახმარების ბრიგადის მიერ, ჰოსპიტლის მიმღებ განყოფილებაში. პირველადი დათვალიერებით მას აღენიშნება სხივის ძვლის მოტეხილობა, შესაძლებელია იყოს საჯდომი, დაბოქვენის ძვლის მოტეხილობა. პაციენტის მდგომარეობა ამ ეტაპზე სტაბილურია, მის სიცოცხლეს საფრთხე არ ემუქრება", — ამბობს ექიმი.

სუს-მა დაკავებულთა შესახებ ინფორმაცია, დღეს, 5 ოქტომბერს გაავრცელა. უწყების ცნობით, უკანონო დაკავების მომენტიდან მოხდა ცხელი ხაზის გააქტიურება, ევროკავშირის სადამკვირვებლო მისიისა და ჟენევის საერთაშორისო დისკუსიების თანათავმჯდომარეების ინფორმირება.

მათივე განცხადებით, უკანონოდ დაკავებული ერთი პირი უახლოეს პერიოდში გადმოეცემა საქართველოს ცენტრალურ ხელისუფლებას და მიმდინარეობს აქტიური მუშაობა უკანონო პატიმრობაში დარჩენილი პირების გათავისუფლების მიზნით.