დეპუტატი სალომე სამადაშვილი აცხადებს, რომ უცნაურად ეჩვენება ქართული ოცნების ლიდერების მიერ არჩევნებში გამარჯვების აღნიშვნა. ასე გამოეხმაურა იგი პარლამენტის პლენარულ სესიაზე მმართველი პარტიის დეპუტატების მიერ ერთმანეთისთვის და მოსახლეობისთვის არჩევნებში გამარჯვების მილოცვას.

"აწყობილი, ზეიმისთვის გამზადებული და შემდეგ დაშლილი სცენა, გამარჯვებას როდის აქეთ ნიშნავს, არ ვიცი. მე მგონი, ყველას გვახსოვს თქვენი სახეები არჩევნების ღამეს და მე მგონი, ყველას გვახსოვს, რომ დღესასწაულს ის დღე ნამდვილად არ ჰგავდა.

თქვენ, ძვირფასი კოლეგებო, ეტყობა ვერ მიხვდით, რა დატრიალდა თქვენს თავს, რომ ყველგან, საქართველოს ყველა დიდ ქალაქში, სადაც თქვენი სამარცხვინო სტრატეგია და ტაქტიკა არჩევნების — ადამიანების დაშინების, მოსყიდვის არ მუშაობს, ქართულმა ოცნებამ წააგო ეს არჩევნები", — განაცხადა სალომე სამადაშვილმა.

მისი თქმით, საზოგადოება ქართულ ოცნებას მეორე ტურში "გასცემს პასუხის".

2 ოქტომბერს, არჩევნების მიმდინარეობისას, ქართულმა ოცნებამ საზეიმო სცენის აწყობა ჯერ კიდევ შუადღეზე, კენჭისყრის დასრულებამდე ექვსი საათით ადრე დაიწყო. ზუსტად 8 საათზე, ტელეკომპანია იმედის დაკვეთით ჩატარებული GORBI-ს კვლევის შედეგების გამოქვეყნების შემდეგ კი მმართელმა პარტიამ არჩევნებში გამარჯვება იზეიმა.

ცესკოს საბოლოო მონაცემების მიხედვით არჩევნების მეორე ტური 20 ქალაქსა თუ თვითმმართველ თემში გაიმართება.