დეპუტატი არმაზ ახვლედიანი პარლამენტში პლენარულ სხდომაზე არჩევნებთან დაკავშირებით ქართული ოცნების წარმომადგენლებს მიმართავს და ეკითხება, თუ რა უხარიათ.

"კოლეგებო, მინდა გკითხოთ, მართლა გიხარიათ? თუ გიხარიათ, რა გიხარიათ, იქნებ ჩვენც გაგვიხარდეს იმიტომ, რომ იქნებ მივაღწიოთ ისეთ დღეს საქართველოში, როცა ერთად გაგვიხარდება, მაგრამ ახლა, რაც თქვენ გიხარიათ და გგონიათ, რომ თავი ქუდში გაქვთ, ეს არის საკუთარი თავის ტყუილში ყოფნა. არც მეტი და არც ნაკლები", — აცხადებს დეპუტატი.

მისივე თქმით, ხელისუფლებასა და ხალხს შორის უფსკრული კიდევ უფრო გაღრმავდა და არჩევნების მიმართ უნდობლობა გაორმაგდა.

"როგორ შეიძლება გიხაროდეს, როცა ისედაც ღრმა უფსკრული ხელისუფლებასა და საზოგადოებას შორის წარმოუდგენლად გაღრმავდა. როცა უნდობლობა არჩევნების მიმართ, რაც იყო, ალბათ, გაორგამგდა კიდეც. ან რა გიხარიათ, როდესაც იცით, რომ მთავარ ქალაქებში ცუდად გაქვთ საქმე და ეს იმ ვითარებაში, იმ პირობებში, როდესაც მართალია, აქ თქვა რამდენიმე კოლეგამ, რომ საკანონმდებლო პროცედურული სივრცე შეიცვალა, მაგრამ არსებითად ხომ არაფერი არ შეცვლილა. ადმინისტრაციული მანქანა ხომ ისევ ისე და უფრო მძიმედ, უფრო უარესადაც მუშაობს, ფულის რესურსი ხომ კვლავ უკონტროლოა და ა.შ. არ ჩამოვთვლი. ამ წნეხის პირობებშიც კი მოხერხდა საზოგადოების ძალისხმევით, ოპოზიციის მონდომებით რომ დიდ ქალაქებში გამარჯვება არ არის თქვენს სასარგებლოდ", — თქვა ახვლედიანმა.

დღეს, 5 ოქტომბერს პარლამენტში საშემოდგომო სესიის პლენალური სხდომა იმართება. სხდომაზე ქართული ოცნებისა და ოპოზიციის წარმომადგენლებმა 2 ოქტომბრის არჩევნებზე ისაუბრეს, მათ შორის, ირაკლი კობახიძემ ქართული ოცნების "გამარჯვება" თითოეულ მოქალაქეს მიულოცა, რადგან მისი აზრით, 2 ოქტომბერს ქვეყანაში დემოკრატიამ, ქვეყნის განვითარებამ, მშვიდობამ და სტაბილურობამ გაიმარჯვა.