ქართული ოცნების თავმჯდომარის, ირაკლი კობახიძის განცხადებით, ძალიან მაღალი ალბათობით, 64-ვე მეტი ქართული ოცნების წარმომადგენელი იქნება.

"ჩვენ გვაქვს მონაცემები რეგიონებიდან, წინასწარი მონაცემები და შეიძლება ითქვას, რომ უმეტეს შემთხვევაში დაახლოებით, ალბათ, ეს არის 80% მაინც შემთხვევების პირველივე ტურში იგებენ ჩვენი კანდიდატები მერის არჩევნებს, სხვა შემთხვევაში შეიძლება იყოს საჭირო მეორე ტური, თუმცა წინასწარი მონაცემები ისეთია, რომ მეორე ტურში არცერთ მათგანს არ გაუჭირდება მოგება, ანუ ძალიან მაღალი ალბათობით, 64-ვე მერი იქნება ქართული ოცნების წარმომადგენელი", — განაცხადა მან.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.