პრემიერმინისტრი ირაკლი ღარიბაშვილი ისევ არ ამბობს, როგორ შემოვიდა ქვეყანაში ექსპრეზიდენტი მიხეილ სააკაშვილი ისე, რომ საზღვარზე არ დააკავეს. თუმცა, ირწმუნება, რომ იმაზე მეტი იციან, "ვიდრე ვინმეს წარმოუდგენია".

"ის ფაქტი, რომ ჩვენმა სამართალდამცავებმა მიხეილ სააკაშვილის სამალავი ბინის კარი გააღეს გასაღებით, მე ვფიქრობ, ბევრ რამეზე მეტყველებს. ვინ არის ჩამოშლილი და ვინ არის სრულად გაკოტრებული, მე მგონი, ეს ფაქტიც ამაზე მიუთითებს. სიტუაცია იყო სრული კონტროლის ქვეშ, ჩვენ იმაზე მეტი ვიცოდით და ვიცით, ვიდრე ვინმეს წარმოუდგენია, ვიდრე თქვენ წარმოგიდგენიათ, ვიდრე მათ წარმოედგინათ. საბოლოო ჯამში, რა თქმა უნდა, ჩვენ ყველაფერი გავაკეთეთ იმისთვის, რომ შედეგი დამდგარიყო მშვიდობიანი. შევარჩიეთ ის დრო, ის მომენტი, როცა სააკაშვილი იყო მარტო ამ ბინაში. აქედან გამომდინარე, მე ვფიქრობ, რომ ის, რაც ვთქვით, გავაკეთეთ", — განაცხადა ღარიბაშვილმა.

პრემიერმინისტრმა უკრაინელ კოლეგებს მადლობა გადაუხადა და აღნიშნა, რომ ბოლო პერიოდში "საკმაოდ ნაყოფიერი" თანამშრომლობა ჰქონდათ, "თუნდაც მეგის ქარდავას ექსტრადიციის საქმე, ასევე, სააკაშვილის საქმე, მე მგონი, მიუთითებს იმაზე, რომ ჩვენ გვაქვს საკმაოდ ნაყოფიერი თანამშრომელი".

ჟურნალისტების კითხვას, რატომ არ დააკავეს სააკაშვილი მანამდე, ღარიბაშვილი ასე პასუხობს:

"მე ახლა დეტალებში არ შევალ, მაგრამ პოლიცია ყოველთვის აფასებს რისკებს და ჩვენი უსაფრთხოების სამსახური".

მას არ დაუკონკრეტებია, რა რისკებზე საუბრობს და აღნიშნა, რომ ამაზე შესაბამისი უწყებები გააკეთებენ კომენტარებს.