შინაგან საქმეთა სამინისტრო მედიასაშუალებებით გავრცელებულ ინფორმაციას იმის თაობაზე, რომ ბერა ივანიშვილთან დაკავშირებული ინციდენტის გამო შსს-ს ცხრა თანამშრომელი დაითხოვეს, განცხადებით ეხმაურება და წერს, რომ აღნიშნული ინფორმაცია სრული სიცრუეა:

"კატეგორიულად ვაცხადებთ, რომ თბილისის პოლიციის დეპარტამენტის არც ერთ სამმართველოში ბერა ივანიშვილთან დაკავშირებით ინციდენტი არ მომხდარა და არ ფიქსირდება არც ერთი ფაქტი, რომელსაც აღნიშნულ პირთან რაიმე სახით შემხებლობა ექნებოდა.

ამასთან, სიმართლეს არ შეესაბამება ინფორმაცია იმის თაობაზეც, რომ თბილისის პოლიციის დეპარტამენტის ძველი თბილისის სამმართველოდან დაითხოვეს თანამშრომელი".

შსს განმარტავს, რომ პოლიციის დეპარტამენტებსა და სამმართველოებში საკადრო გადაადგილებები პერიოდულად ხორციელდება. მათივე განცხადებით, არც ერთ პირს, ვინც თითქოსდა მომხდარ ინციდენტთან დაკავშირებით მედიასაშუალებებით კომენტარს აკეთებს, არანაირი შეხება არ აქვს შინაგან საქმეთა სამინისტროსთან:

"მსგავსი განცხადებები მხოლოდ შსს-ს დისკრედიტაციას და კონკრეტულ პოლიტიკურ მიზნებს ემსახურება".

დღეს გავრცელებული ინფორმაციით, ძველი თბილისის პოლიციის ყოფილი თანამშრომლები, მათი სამსახურიდან გათავისუფლების მიზეზად ბერა ივანიშვილს ასახელებენ.