ქართული ოცნების დეპუტატის, ბექა დავითულიანის განცხადებით, ექსპრეზიდენტის, მიხეილ სააკაშვილის მიერ გამოქვეყნებული ვიდეოები, სადაც ის ამბობს, რომ ბათუმშია, შესაძლოა გაყალბებული იყოს. მისი თქმით, თუ ეს ასე არ არის, მაშინ სააკაშვილს კიდევ ერთი მუხლი დაემატება საზღვრის უკანონო კვეთისთვის.

"DeepFake-ზე იმდენი ილაპარაკა მთავარმა არხმა, რომ ერთი — შეიძლება ეს კადრები იყოს გაყალბებული, მეორე — თუ ეს ასე არ არის, დაემატება კიდევ ერთი მუხლი საზღვრის უკანონო კვეთისთვის და კიდევ უფრო დიდ სასჯელს მოიხდის. თუმცა, დიდი ალბათობით, ეს არის რეალითი შოუ. ფაქტია, ამ ადამიანს ბავშვობაში დახუჭობანა არავინ ეთამაშებოდა და ახლა, ამ ასაკში გადაწყვიტა, ამ ფორმით. დახუჭობანას თამაშობს, ძალიან სასაცილოა და არასერიოზულია", — ამბობს ის.

დღეს, პირველ ოქტომბერს მიხეილ სააკაშვილმა Facebook-ზე პოსტი გამოაქვეყნა რომელმაც შექმნა ვარაუდი, რომ შესაძლოა, ის უკვე საქართველოშია. ამასთან, მან გაავრცელა ორი ვიდეოც, სადაც ამბობს, რომ ბათუმშია, ფონად კი ქალაქის ხედი ჩანს.

შინაგან საქმეთა სამინისტროში ამბობენ, რომ ექსპრეზიდენტს ქვეყნის საზღვარი არ გადმოუკვეთავს. ქართული ოცნების თავმჯდომარე ირაკლი კობახიძე კი ამტკიცებს, რომ სააკაშვილი საქართველოში არ არის, მისი ვიდეოები ფეიკია და იმაზე უფრო მარტივი ტექნოლოგიითაა გაკეთებული, ვიდრე DeepFake. მის პასუხად სააკაშვილის თანაგუნდელები ამბობენ, რომ ის ნამდვილად ჩამოვიდა,

აღსანიშნია ისიც, რომ 27 სექტემბერს სააკაშვილმა სოციალურ ქსელში გამოაქვეყნა კიევი-თბილისის თვითმფრინავის ბილეთი, რომლის მიხედვითაც 2 ოქტომბერს, დედასთან, გიული ალასანიასთან ერთად უნდა ჩამოფრენილიყო.

ამავე თემაზე: