ევროპულმა საქართველომ პარლამენტში საკანონმდებლო ინიციატივა დაარეგისტრირა, რომელიც, მათი აზრით, ეკონომიკური დანაშაულების სფეროში სისხლის სამართლის კოდექსს უფრო ლიბერალურს გახდის. ამის შესახებ დღეს გამართულ ბრიფინგზე ზურაბ ჭიაბერაშვილმა განაცხადა.

კანონპროექტის მიხედვით:

  • ეკონომიკურ დანაშაულთა მნიშვნელოვან ნაწილზე უქმდება წინასწარი პატიმრობა, ასევე, გაუქმდება პატიმრობა, თუ ეკონომიკური დანაშაული პირის მიერ პირველადაა ჩადენილი;
  • პირველად ჩადენილ ეკონომიკურ დანაშაულზე, თუ დანაშაულის მასშტაბი განსაკუთრებით დიდი ოდენობის არაა, სასჯელი იქნება ჯარიმა ან/და გამასწორებელი სამუშაო;
  • ეკონომიკური დანაშაულის კატეგორიებში იზრდება ზღვრები, რომლის ზემოთაც იწყება ბიზნესის სიხლის სამართლის პასუხისმგებლობა.

ჭიაბერაშვილის განცხადებით, "უბრალო ბუღალტრულ შეცდომასაც კი დღეს მთავრობა კომპანიას სისხლისსამართლებრივ დანაშაულად უთვლის, რაც ბევრ ბიზნესს - განსაკუთრებით, მცირე და საშუალო ბიზნესს - ხელ-ფეხს უკრავს და აჩერებს."