მართალია, პანდემიამ სხვა უამრავ სფეროსთან ერთად კინოინდუსტრიაც შეაფერხა წარმოებისა და რეალიზაციის კუთხით, მაგრამ როგორც სხვა ყველაფერი, კინოსამყაროც ადაპტირდა ახალ გარემოში და მაყურებელს უკვე შეუძლია, ნოსტალგიის გარეშე კვლავინდებურად ისიამოვნოს ახალ-ახალი სანახაობით.

ცნობილი ამბავია, რომ პრემიერების სიუხვითა და მრავალფეროვნებით შემოდგომის სეზონი გამოირჩევა ხოლმე: სწორედ ამ დროს მოიმკიან ყველაზე ხშირად რეჟისორები თუ კინომწარმოებლები თავიანთ მოსავალს და მაყურებელსაც ნამდვილი ზეიმის გამართვა შეუძლია.

ამ მხრივ გამონაკლისი არც წლევანდელი სეზონია და რაც მთავარია, ქართულ აუდიტორიასაც ეძლევა შესაძლებლობა, რომ მსოფლიო პრემიერების თანადროულად დიდ ეკრანზე იხილოს წლის ერთ-ერთი ყველაზე მაღალი მოლოდინების მქონე კინოსურათები.

ნახეთ, ყველა მნიშვნელოვანი სიახლე, რომელიც უახლოეს კვირებში კინომოყვარულებს მხედველობიდან არ უნდა გამორჩეთ:

ვენომი 2 (Venom: Let There Be Carnage)

სამი წლის შემდეგ ტომ ჰარდის პერსონაჟი ეკრანებზე ბრუნდება. გასულ ორ ათწლეულში კომიქსის გმირებზე გადაღებული მძაფრსიუჟეტიანი ფილმების ბუმი იყო, თუმცა სპაიდერ-მენის მოსისხლე მტრად ცნობილი ვენომის დამოუკიდებელი ისტორიის შემქმნელებმა მაინც მოახერხეს, რომ გამორჩეული და განსაკუთრებული სანახაობა შეეთავაზებინათ მაყურებლებისთვის.

ტრეილერით თუ ვიმსჯელებთ, მეორე ნაწილი კიდევ უფრო დაძაბული და დამაინტრიგებელი ჩანს. თანაც, ქართულ კინოთეატრებში ფილმი ამერიკულ პრემიერამდე ერთი დღით ადრე გამოვა, 3 ოქტომბრიდან კი უკვე ქართული გახმოვანებითაც შეგეძლებათ მისი ხილვა.

პრემიერის თარიღი: 30 სექტემბერი

ჯეიმს ბონდი: სიკვდილის დრო არ არის (No Time to Die)

პრემიერის თარიღის მრავალჯერ შეცვლის შემდეგ, როგორც იქნა, ვიხილავთ ბონდიანას ახალ ნაწილს, რომელსაც არაერთმა კრიტიკოსმა უკვე უმაღლესი შეფასება მიანიჭა და აგენტი 007-ის შესახებ გადაღებულ ერთ-ერთ საუკეთესო ნამუშევრადაც აღიარა.

სიკვდილის დრო არ არის გამორჩეულია იმითაც, რომ ის ჯეიმს ბონდის შესახებ გადაღებული რიგით 25-ე ფილმია, ხოლო დენიელ კრეიგის ბოლო პროექტი, რომელშიც მსახიობი მთავარ როლს მოირგებს: ისტორიის გაგრძელებაში უკვე ახალ აგენტ 007-ს გავიცნობთ.

პრემიერის თარიღი: 7 ოქტომბერი

ადამსების ოჯახი 2 (The Addams Family 2)

განსაკუთრებული სიახლე ელოდებათ ანიმაციების მოყვარულებსაც, ოღონდ ამ შემთხვევაში არა მხოლოდ ბავშვები და მოზარდები, არამედ ნებისმიერი ასაკის მაყურებლები მიიღებენ დაუვიწყარ სიამოვნებას დიდ ეკრანზე ამ სახალისო და ემოციური სანახაობის ხილვით.

აღსანიშნავია ის ფაქტიც, რომ ამ მულტფილმის პერსონაჟებს ისეთი ცნობილი სახეები ახმოვანებენ, როგორებიც შარლიზ ტერონი, ოსკარ აიზეკი და სნუპ დოგი არიან.

პრემიერის თარიღი: 14 ოქტომბერი

დიუნი (Dune)

ეს არა მხოლოდ ოქტომბრის ან შემოდგომის, არამედ წლის ერთ-ერთი ყველაზე მნიშვნელოვანი მოვლენაა, რომელიც არავის უნდა გამორჩეს, ვისაც კი კინოში მომხდარი ჯადოსნური სასწაულების სჯერა. ფილმების სიკარიო (Sicario), დანის პირზე მორბენალი 2049 (Blade Runner 2049) და ჩამოსვლა (Arrival) რეჟისორმა, დენი ვილნევმა ახალი ფილმი გადაიღო, თანაც ჟანრული ლიტერატურის ერთ-ერთი ყველაზე საკულტო წიგნის — ფრენკ ჰერბერტის დიუნის მიხედვით.

სხვა თუ არაფერი, მარტო სამსახიობო შემადგენლობის გამოც კი ღირს, რომ დიდ ეკრანზე დატკბეთ მათი შესრულებით: მთავარ როლებში ვიხილავთ ტიმოთი შალამეს, ზენდეიას, ჯეისონ მომოას, ხავიერ ბარდემს, რებერკა ფერგიუსონსა თუ სტელან სკარსგარდს.

პრემიერის თარიღი: 22 ოქტომბერი

კინოსეანსებზე დასასწრები ბილეთების შეძენა შეგიძლიათ როგორც კინოთეატრების სალაროებში, ისე ვებსაიტზე kinoafisha.ge, სადაც სხვა დაგეგმილ სიახლეებსაც მიადევნებთ თვალს.