"ვის უნდა უჩივლოს, მე უნდა მიჩივლოს?" — ასე პასუხობს პრემიერმინისტრი, ირაკლი ღარიბაშვილი სახელისა და რეპუტაციის შელახვაზე ექსპრემიერის მიერ პროკურატურაში შეტანილი სარჩელის შესახებ დასმულ შეკითხვას. ღარიბაშვილის აზრით, ქვეყნის მოსახლეობას ამა თუ იმ ადამიანის ნარკოდამოკიდებულების საკითხი არ აინტერესებს.

"მე მგონი, ვისაც დებენ ბრალს მან უნდა დაამტკიცოს არის თუ არა ნარკოტიკის მომხმარებელი, არ არის საინტერესო, ჩვენს მოსახლეობას არ აინტერესებს ამა თუ იმ ადამიანის ნარკოდამოკიდებულება", — ამბობს ღარიბაშვილი.

გახარიას პარტიამ დღეს, 27 სექტემბერს პროკურატურას მიმართა და ნარკოდანაშაულის ბრალდებებზე გამოძიებას ითხოვს.

პარტიის პოლიტსაბჭოს წევრის, ანა ბუჩუკურის თქმით, ისინი სწრაფ და ეფექტურ გამოძებას ითხოვენ და პირველ რიგში, უნდა დაიკითხოს ირაკლი კობახიძე, რომელმაც გახარია "კოკაიშნიკად" მოიხსენია.

16 სექტემბერს ირაკლი კობახიძემ გიორგი გახარიას "კოკაიშნიკი" უწოდა. თავად გახარიამ 17 სექტემბერს განაცხადა, რომ ვენის ჰოსპიტალში ჩატარებული ექსპერტიზის შედეგად, ნარკოტიკული ნივთიერების მოხმარება არ დაუდასტურდა.

21 სექტემბერს თბილისის მოქმედმა მერმა და მერობის კანდიდატმა კახა კალაძემ მერობის კანდიტატების დებატებისას ყოფილ თანაგუნდელ გიორგი გახარიაზე თქვა, რომ მისთვის ნარკომანობა არავის დაუბრალებია.

კობახიძემ 24 სექტემბერს განაცხადა, რომ ნარკოტიკი გახარიას პირველად ქალმა გაასინჯა, რამდენიმე ხანში კი კობახიძემ აღნიშნა, რომ ის გახარიას პარტიის წევრია და თბილისის საკრებულოს სიაშია. მის ამ განცხადებას გახარიას პარტიის წევრი ქალების გამოხმაურება მოჰყვა, რომელმაც კამპანიური სახე მიიღო. "ის ქალი მე ვარ", — წერდნენ ფეისბუქგვერდზე ყოფილი პრემიერმინისტრის გუნდის წევრები.

ნარკოტესტი პირველად ქართული ოცნების მერობის კანდიდატმა, კახა კალაძემ ჩაიტარა, ეს ჯანსაღი ცხოვრების პოპულარიზაციით ახსნა და სხვა კანდიდატებსაც იგივე მოუწოდა. მოწოდების საპასუხოდ, გახარიამ განაცხადა, რომ ოპონენტებმა მასთან დებატებზე პირისპირ დაჯდომის შიშით "ბანკებით" სირბილი დაიწყეს. 10 სექტემბერს მან, ასევე, განაცხადა, რომ ახლო მომავალში ნარკოტესტთან დაკავშირებით "საინტერესო ინფორმაციას" გაამხელდა.