ქართული ოცნების აღმასრულებელი მდივნის, მამუკა მდინარაძის მტკიცებით, ექსპრემიერმა გიორგი გახარიამ ნარკოტესტი არასერთიფიცირებულ კლინიკაში გაიკეთა. ასე გამოეხმაურა ის გახარიას მიერ ნარკოტესტის ჩატარებას ავსტრიაში, ვენის ერთ-ერთ კლინიკაში.

"თვითონ რა ჩაატარა ვერ მივხვდი, გასაღიმებელიც შეიძლება იყოს, მაგრამ, არც იყოს. თვითონ თქვა, რომ მოიცლის თუ არა მივა. შემდეგ ვეღარ მოიცალა. შემდეგ როდის არისო იკითხა. შემდეგ კოკაინი არავის უხსენებია, თვითონ ახსენა, მაინც და მაინც კოკაინი. რატომ ახსენა კოკაინი ვერავინ ვერ გაიგო. შემდეგ წავიდა და სერთიფიცირება არ აქვს საერთოდ ამ სფეროში, ისეთ კლინიკაში ჩააბარა ანალიზი", — განაცხადა მდინარაძემ.

მისივე თქმით, აღნიშნული საზოგადოებაში ეჭვის საფუძველს თავისთავად იწვევს, თორემ ამას მმართველი გუნდი "ვერც ვერავის კადრებდა".

გიორგი გახარიამ 17 სექტემბერს განაცხადა, რომ ვენის ჰოსპიტალში ჩატარებული ექსპერტიზის შედეგად, ნარკოტიკული ნივთიერების მოხმარება არ დაუდასტურდა.

ნარკოტესტი პირველად ქართული ოცნების მერობის კანდიდატმა, კახა კალაძემ ჩაიტარა, ეს ჯანსაღი ცხოვრების პოპულარიზაციით ახსნა და სხვა კანდიდატებსაც იგივე მოუწოდა. მოწოდების საპასუხოდ, გახარიამ განაცხადა, რომ ოპონენტებმა მასთან დებატებზე პირისპირ დაჯდომის შიშით "ბანკებით" სირბილი დაიწყეს. 10 სექტემბერს მან, ასევე, განაცხადა, რომ ახლო მომავალში ნარკოტესტთან დაკავშირებით "საინტერესო ინფორმაციას" გაამხელდა.

გაიგე მეტი: