ლელო საქართველოსთვის ერთ-ერთი ლიდერის, ბადრი ჯაფარიძის განცხადებით, ის წინააღმდეგია პოლიტიკოსების მიერ ერთმანეთის ლანძღვისა და შეურაცხყოფის. ამ სიტყვებით ჯაფარიძე ქართული ოცნებისა და ენმ-ს თავმჯდომარეებს შორის მომხდარ სიტყვიერ და ფიზიკურ დაპირისპირებასა ეხმაურება.

"საზოგადადოდ, მე წინააღმდეგი ვარ პოლიტიკოსების მიერ ერთმანეთის შეურაცხყოფის, დედის გინების, ათასგვარი ეპითეტებით მოხსენიების და ა.შ. [...] წინააღმდეგი ვარ პოლიტიკოსებს შორის ასეთი მიმართვის და მიმაჩნია, რომ ასეთი შეჯახებები, ასეთი ტიპის ლანძღვა-გინება მხოლოდ ძაბავს ვითარებას", — ამბობს ჯაფარიძე.

23 სექტემბერს ევროკავშირის ოფისთან ნაციონალური მოძრაობის ლიდერი, ნიკა მელია და ქართული ოცნების თავმჯდომარე, ირაკლი კობახიძე ერთმანეთს ფიზიკურად დაუპირისპირდნენ და აგინეს. ისინი ერთმანეთს ხელებს უქნევდნენ, მუშტი ჰქონდათ მოღერებული, მათ შორის კი ჟურნალისტები და ოპერატორები იდგნენ. კობახიძეს რამდენჯერმე მუშტი დაუჭირეს, ხოლო მელიამ მიკროფონზე მიუთითა და მმართველი გუნდის თავმჯდომარეს ჰკითხა, "გინდა გესროლო?". მოგვიანებით კობახიძე დაცვამ ადგილიდან გაიყვანა.

მოგვიანებით ბრიფინგზე კობახიძემ საზოგადოებას ბოდიში მოუხადა იმ სიტყვების გამო, რომელიც მისგან მოისმინა.

გუშინ, 24 სექტემბერს ევოკავშირის ელჩმა საქართველოში, კარლ ჰარცელმა ევროკავშირის წარმომადგენლობის ოფისის წინ ნიკა მელიასა და ირაკლი კობახიძეს შორის მომხდარი დაპირისპირების შესახებ განცხადება გაავრცელა, სადაც თქვა, რომ წუხს ამ ფაქტის გამო. მან ასევე აღნიშნა, რომ კობახიძის მხრიდან ბოდიშის მოხდა მისასალმებელია.