ქართული ოცნების დეპუტატის, მიხეილ ყაველაშვილის თქმით, მათ არ უნდათ ნაციონალურ მოძრაობას ნიკა მელიაზე უკეთესი თავმჯდომარე ჰყავდეს. ასე გამოეხმაურა ის მელიასა და ქართული ოცნების თავმჯდომარეს, ირაკლი კობახიძეს შორის დაპირისპირებას.

"სპეციალურად აკეთებს ამას. ეს ადამიანი არის შოუმენი, დგამს ამ შოუს [...] მშვენიერი თავმჯდომარე ჰყავს ნაციონალურ მოძრაობას ჩვენთვის. ამაზე უკეთესი და ჭკვიანი, არ გვინდა, რომ ჰყავდეს", — განაცხადა მიხეილ ყაველაშვილმა.

23 სექტემბერს, ევროკავშირის ოფისთან, ნაციონალური მოძრაობის თავმჯდომარე, ნიკა მელია და ქართული ოცნების თავმჯდომარე, ირაკლი კობახიძე ერთმანეთს დაუპირისპირდნენ. ინციდენტი მაშინ მოხდა, როცა კობახიძე ჟურნალისტებს კომენტარს აძლევდა. ადგილზე მელიას მისვლის შემდეგ ჯერ სიტყვიერი დაპირისპირება დაიწყო, შემდეგ კი ერთმანეთისკენ ფიზიკურად გაიწიეს.

ისინი ერთმანეთს ხელებს უქნევნდნენ, მუშტი ჰქონდათ მოღერებული, მათ შორის კი ჟურნალისტები და ოპერატორები იდგნენ. კობახიძეს რამდენჯერმე მუშტი დაუჭირეს, ხოლო მელიამ მიკროფონზე მიუთითა და მმართველი გუნდის თავმჯდომარეს ჰკითხა, "გინდა გესროლო?". მოგვიანებით კობახიძე დაცვამ ადგილიდან გაიყვანა.

გაიგე მეტი: