მთავარი პროკურატურის წარმომადგენლები გავრცელებული ფაილების საქმეზე On.ge-ის ოფისში მოვიდნენ. გამომძიებელი რედაქციას დღეს, 24 სექტემბერს დაუკავშირდა.

On.ge გამოძიებასთან თანამშრომლობას აპირებს და უწყების წარმომადგენლებს საჭირო ინფორმაციას მიაწვდის.

"დღეს დაგვიკავშირდნენ პროკურატურიდან და აინტერესებდათ, ჩვენც გვაქვს თუ არა ის ფაილები, რომლებიც, სავარაუდოდ, სუს-ის ყოფილმა თანამშრომელმა გაავრცელა. იურისტებთან კონსულტაციის შემდეგ ჩვენ გამოვთქვით პროკურატურასთან თანამშრომლობის მზაობა. ამ ეტაპზე მათ არ აქვთ წარმოდგენილი მოსამართლის განჩინება ან შესაბამისი დადგენილება, რის გამოც დავთანხმდით მხოლოდ ელექტრონულ ფოსტაზე მოსული შეტყობინების მიწოდებაზე. მოსამართლის განჩინების შემდეგ, მზად ვართ საგმოძიებო უწყებას მივაწოდოთ ის ფაილები, რომლებიც ღია წყაროზე გავრცელდა", — აცხადებს On.ge-ს მთავარი რედაქტორი, ხატია ღოღობერიძე.

გავრცელებული ფაილების საქმეზე საგამოძიებო ორგანოების წარმომადგენლები აქამდე სხვადასხვა მედიის ოფისში იყვნენ მისული.

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ჩანაწერების მიხედვით, უსმენენ და უთვალთვალებენ ელჩებსა და საელჩოების თანამშრომლებსაც. ფაილებში დაარქივებულია ევროკავშირის ელჩისა და მისი თანამშრომლის საუბარი. თავდაპირველად, ელჩი თანამშრომელს პროტოპრესვიტერ გიორგი ზვიადაძის ნომერს სთხოვს, შემდეგ კი მიმდინარე საკითხებზე თავის პოზიციას აფიქსირებს.

დოკუმენტებში არის ინფორმაცია ამერიკის საელჩოს წარმომადგენლების შესახებაც. მაგალითად, მითითებულია, რომ ელჩის თანაშემწეს დაუკავშირდა USAID-ის წარმომადგენელი და კონკრეტული შეხვედრის მონაწილეების შესახებ ინფორმაცია დააზუსტა.

მსგავსი ინფორმაციები გვხვდება გერმანიის, საფრანგეთის, ისრაელის და სხვა საელჩოების შემთხვევაშიც.

გაიგეთ მეტი გავრცელებულ ჩანაწერებზე: