13 სექტემბერს გავრცელებულ ფაილებთან დაკავშირებით, პროკურატურის წარმომადგენლები მთავარ არხის ოფისშიც მივიდნენ. ტელევიზიის ცნობით, საქმესთან დაკავშირებით 21 სექტემბერს გამოკითხვაზე არხის გენერალური დირექტორი, ნიკა გვარამიაც იმყოფებოდა.

16 სექტემბერს პროკურატურა TV პირველშიც იმყოფებოდა. ტელევიზიის იურისტმა და არხის საინფორმაციო სამსახურის უფროსმა, ნოდარ მელაძემ მაშინ განმარტა, რომ ტელევიზიაში პროკურატურა მათი ნებით შევიდა და თანამშრომლობის სურვილით უწყებას ფარული ჩანაწერები გადასცეს. პროკურატურის წარმომადგენლები ფორმულაშიც მივიდნენ.


13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ატვირთულია Word-ის ათასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე.

ჩანაწერების გამოქვეყნებიდან მეორე დღეს, სახელმწიფო უსაფრთხოების სამსახურმა განცხადება გაავრცელა, სადაც აღნიშნავს, რომ მსგავსი ინფორმაციის ტირაჟირება შეურაცხყოფს ცალკეული ადამიანების, უსაფრთხოების ოფიცრებისა და მთლიანად სამსახურის პატივსა და ღირსებას. უწყებამ მოუწოდა მედიასა და პოლიტიკურად დაინტერესებულ პირებს, გამოძიების დასრულებამდე თავი შეიკავონ არაზუსტი და გადაუმოწმებელი ინფორმაციის გავრცელებისგან.

გაიგეთ მეტი გავრცელებულ ჩანაწერებზე: