ქართული ოცნების დეპუტატისა და ადამიანის უფლებათა კომიტეტის თავმჯდომარის, მიხეილ სარჯველაძის განცხადებით, თუ ვინმეს არ უნდა, ქვეყანაში დაძაბულობა არსებობდეს, მელიას უნდა უთხრას: "გაჩერდი და ასეთ ქცევებს ნუ ახორციელებს". კითხვაზე აღნიშნული მელიასთვის ჰარცელს უნდა ეთქვა თუ არა, სარჯველაძე პასუხობს, რომ "რასაკვირველია". იგი ასე გამოეხმაურა ევროკავშირის წარმომადგენლობასთან მელია-კობახიძის დაპირისპირებას.

"ვის რა როლი აქვს ამ სპექტაკლში, ჰარცელს, ჯაფარიძეს, მელიას, ა.შ. ეს ადგნენ და გაარკვიონ და ერთმანეთში არკვიონ, მაგრამ ის ამაზრზენი ქცევები, რომელსაც ახლა გვთავაზობენ, ამის პოპულარიზებას ეწევიან და იმის ნაცვლად, რომ გამოვიდნენ და თქვან კონკრეტულად, რომ მელიამ რაც იკადრა, არის წარმოუდგენელი რამ, ამის ნაცვლად, ახლა რაღაც ალტერნატიულ ვერსიებს და ალტერნატიულ საყურადღებო ცენტრებს ქმნიან, რატომ?

ვის რა როლი აქვს, ვერ გეტყვით, მაგრამ თუ ვინმეს არ უნდა ამ ქვეყანაში, რომ ასეთი დაძაბულობის კერები, ასეთი კონფლიქტები იქმნებოდეს, უნდა გამოვიდეს და უნდა უთხრას, რომ მელია, გაჩერდი და ასეთ ქცევებს ნუ ახორციელებ და დამთავრდა, რაღად უნდა ამას შემდეგ რაღაც ინიციატივები.

რასაკვირველია, მათ შორის, მელიასთვის უნდა ეთქვა [ჰარცელს] ეს, ორი აზრი არ არსებობს ამაში და თავს იკავებს. მე, რა ვიცი რა უთხრა, მაგრამ იმის მერე რაც გამოდის ამბავი, ყველა ცდილობს, რომ სხვაგან გადაიტანოს მიმართულებები", — განაცხადა სარჯველაძემ კითხვაზე, ჰარცელს რა როლი აქვს მომხდართან დაკავშირებით.

23 სექტემბერს, ევროკავშირის ოფისთან, ნიკა მელია და ირაკლი კობახიძე ერთმანეთს დაუპირისპირდნენ. ინციდენტი მაშინ მოხდა, როცა კობახიძე ჟურნალისტებს კომენტარს აძლევდა. ადგილზე მელიას მისვლის შემდეგ ჯერ სიტყვიერი დაპირისპირება დაიწყო, შემდეგ კი ერთმანეთისკენ ფიზიკურად გაიწიეს.

ისინი ერთმანეთს ხელებს უქნევნდნენ, მუშტი ჰქონდათ მოღერებული, მათ შორის კი ჟურნალისტები და ოპერატორები იდგნენ. კობახიძეს რამდენჯერმე მუშტი დაუჭირეს, ხოლო მელიამ მიკროფონზე მიუთითა და მმართველი გუნდის თავმჯდომარეს ჰკითხა, "გინდა გესროლო?". მოგვიანებით კობახიძე დაცვამ ადგილიდან გაიყვანა.

დაპირისპირების შემდეგ, ევროკავშირის წარმომადგენლობის ოფისთან მალევე ქართული ოცნების მხარდამჭერები შეიკრიბნენ. ისინი აცხადებდნენ, რომ ადგილზე დარჩებოდნენ ნიკა მელიას გამოსვლამდე. მოგვიანებით, ქართული ოცნების ოფისში პარტიის წარმომადგენლებმა ბრიფინგი გამართეს. მამუკა მდინარაძემ განაცხადა, რომ იქ შეკრებილებს ტერიტორიის დატოვება პირადად სთხოვეს. არსებული ინფორმაციით, მმართველი პარტიის მომხრეები დაიშალნენ, თუმცა ადგილზე ნაციონალური მოძრაობის მხარდამჭერები მივიდნენ.

ნაციონალური მოძრაობის წევრის, ბაჩო დოლიძის განცხადებით, შეხვედრა დასრულდა, თუმცა სანამ შინაგან საქმეთა სამინისტრო ტერიტორიის უსაფრთხოებას არ უზრუნველყოფს, ელჩის თხოვნაა, რომ შეხვედრის მონაწილეები შენობაში დარჩნენ.

შეგახსენებთ, რომ პარტიების ლიდერები საქართველოში ევროკავშირის ელჩთან, კარლ ჰარცელთან წინასაარჩევნო გარემოზე სასაუბროდ მივიდნენ.

გაიგე მეტი: