ზუგდიდის მაჟორიტარობის კანდიდატი გიგი უგულავა აცხადებს, რომ ევროკავშირის ოფისთან ქართული ოცნების "ზონდერები" იკრიბებიან და თუ ხელისუფლება ისედაც გართულებული საერთაშორისო სკანდალის ფონზე დაპირისპირებას დაუშვებს, "კატასტროფა იქნება".

"ამ წუთებში ქართული ოცნების ზონდერები იკრიბებიან ევროკავშირის ოფისთან, იმისათვის, რომ ელჩების შეხვედრიდან გამოსულ ჩვენს კოლეგებს დახვდნენ, შეურაცხყოფა მიაყენონ. ყველა ზღვარს გადავიდა... საერთაშორისო სკანდალი კიდევ უფრო ღრმავდება, და თუ ქართული ოცნება, უფრო სწორედ, ამ შემთხვევაში ხელისუფლება ცემა–ტყეპას დაუშვებს პირდაპირ ევროკავშირის ოფისთან, ეს კატასტროფა იქნება ქვეყნის იმიჯისთვის", — თქვა უგულავამ მთავარი არხის ეთერში

ევროკავშირის წარმომადგენლობის ოფისთან ქართული ოცნებისა და ნაციონალური მოძრაობის თავმჯდომარეები ერთმანეთს სიტყვიერად და ფიზიკურად დაუპირისპირდნენ. ისინი ერთმანეთს ხელებს უქნევნდნენ, მუშტი ჰქონდათ მოღერებული, მათ შორის კი ჟურნალისტები და ოპერატორები იდგნენ. კობახიძეს რამდენჯერმე მუშტი დაუჭირეს, ხოლო მელიამ მიკროფონზე მიუთითა და მმართველი გუნდის თავმჯდომარეს ჰკითხა, "გინდა გესროლო?". მოგვიანებით კობახიძე დაცვამ ადგილიდან გაიყვანა.

დაპირისპირების შემდეგ ევროკავშირის ოფისთან ქართული ოცნებისა და ნაციონალური მოძრაობის ახალგაზრდული ფრთის წევრები იკრიბებიან, ადგილზე მობილიზებულია პოლიციაც.

დღეს, 23 სექტემბერს, ევროკავშირის ელჩსა და ირაკლი კობახიძეს შორის შეხვედრა გაიმართა. შეხვედრის დასრულების შემდეგ ირაკლი კობახიძე და ნიკა მელია ერთმანეთს ჯერ სიტყვიერად, შემდეგ კი ფიზიკურად დაუპირისპირდნენ. ინციდენტი მას შემდეგ დაიწყო, რაც კობახიძეს ჟურნალისტებთან კომენტარის გაკეთების დროს მელიამ დმანისში მომხდარ შემთხვევაზე ჰკითხა.