ამ წუთებში ბავშვთა სამყაროს დაზარალებული მოვაჭრეები თბილისში, პარლამენტის შენობასთან აქციას მართავენ.

რამდენიმე ათეული ადამიანი პრემიერ-მინისტრთან შეხვედრას და ხანძრით მიყენებული ზარალის ანაზღაურებას მოითხოვს.

აღნიშნული მოთხოვნებით დაზარალებულმა მოვაჭრეებმა აქცია რამდენჯერმე გამართეს. მათ შორის, გუშინ, 18 მარტს, კანცელარიასთან.

დედაქალაქის და ცენტრალური მთავრობის წევრების განცხადებით, ხელისუფლებამ თავისი კომპეტენციის ფარგლებში ყველაფერი გააკეთა. თბილისის მერის, დავით ნარმანიას თქმით, "მთავრობის ფუნქციას არ განეკუთვნება ასეთ შემთხვევაში [ბავშვთა სამყაროს ხანძრის შედეგად] მიყენებული ზიანის ანაზღაურება."

თბილისში, სავაჭრო ცენტრ ბავშვთა სამყაროში 30 იანვარს, გამთენიისას გაჩენილი ხანძრის შედეგად სრულიად განადგურდა შენობა, დაზარალდა ათობით მოვაჭრე, რომლებსაც სავაჭრო ცენტრში და მის მიმდებარე ბაზრობებზე ტანსაცმლის, ავეჯის, ოქრო-ვერცხლის მაღაზიები ჰქონდათ.