საქართველოს პრემიერმინისტრის, ირაკლი ღარიბაშვილის განცხადებით, მთავრობას ყველა მოქალაქე უნდა სთხოვდეს, რომ პატრიარქი დაცული იყოს და მისი გარემოცვა სრული კონტროლის ქვეშ აყვანილი.

"მე არ ვიცი, გასარკვევია, უსმენდა თუ არა რეალურად პატრიარქის გარემოცვას და რა მიზნით, მაგრამ კიდევ ვიმეორებ, რომ მთავრობის და სახელმწიფო უსაფრთხოების სამსახურის პირდაპირი მოვალეობაა და ვალდებულება არის, მათ შორის სახელმწიფო დაცვის სამსახურის რომ, რა თქმა უნდა, ჩვენი პატრიარქი მათ შორის ყველა რისკებისგან იყოს დაცული. ამაზე ალბათ ვთანხმდებით. ნებისმიერი მოქალაქე უნდა სთხოვდეს მთავრობას, რომ პატრიარქი იყოს დაცული და მისი გარემოცვა იყოს აბსოლუტურად სრული კონტროლის ქვეშ აყვანილი, რა თქმა უნდა, კანონიერად. მე სარწმუნო რაღაც ცნობები და ინფორმაციები არ მაქვს, მე ვარაუდებს გამოვთქვამ. ვიყავი რა შინაგან საქმეთა მინისტრი და მათ შორის ვხელმძღვანელობდი ამ უსაფრთხოების სამსახურებს, ვიცი, ეს როგორ ხდება", — განაცხადა ღარიბაშვილმა რუსთავი 2-ის ეთერში.

პრემიერმინისტრის განცხადებით, მთავრობასა და ეკლესიას მტკიცე ერთობა აქვს.

"ჩვენ, მთავრობასა და ეკლესიას გვაქვს მტკიცე ერთობა და სრულ კოორდინაციაში ვართ საერთო ეროვნულ საკითხებთან მიმართებაში. ისეთ მნიშვნელოვან საკითხებზე, რომელიც ეხება ჩვენი ქვეყნის, საზოგადოების ბედს და მომავალს, ამ საკითხებზე სრული კოორდინაცია და ჰარმონიული ურთიერთობა გვაქვს.

უწმინდესი პატრიარქი არის სახელმწიფოს დაცვის ქვეშ. მე, როგორც მოქალაქე, დავსვამდი კითხვას — რომელი სახელმწიფოა სახელმწიფო და მთავრობა, რომელიც პატრიარქის უსაფრთხოებაზე არ ზრუნავს? მე ამიტომ ვამბობ, რომ გასარკვევია და იდენტიფიკაციაა მოსახდენი, ალბათობის თეორიით რომ გავყვეთ, ამ ჩანაწერებიდან რომელი იყო ლეგიტიმური, კანონიერი და რომელი არ იყო", — განაცხადა ღარიბაშვილმა.