ნაციონალური მოძრაობის წევრის, რომან გოცირიძის თქმით, თბილისის მერი და მერობის კანდიდატი კახა კალაძე სუს-ს სოლიდარობას არ უნდა უცხადებდეს, რადგან ისინი მასაც უსმენენ.

"ახლა კალაძე რომ გამოდის და სოლიდარობა სუს-ს, სოლიდარობა სუს-ს კი არა, გისმენენ, ჩემო კახა. ახლა ივანიშვილი იმის ჩიტია, რომ კახა კალაძეს არ მოუსმინოს? ყველას უსმენენ. დღეს სუს არის ივანიშვილის საცეცები და მარჯვენა ხელი, ყველა ყურებით ჰყავთ დაჭერილი, უღირსი მღვდლებით დაწყებული, უღირსი პოლიტიკოსებით დამთავრებული", — თქვა გოცირიძემ პალიტრანიუსის ეთერში.

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ატვირთულია Word-ის ასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე. ფაილებს შორის არის ინფორმაცია რუსული კონტაქტების, ასევე, კონკრეტული პოლიტიკური პარტიების მიმართ დამოკიდებულების შესახებ.

ჩანაწერების გამოქვეყნებიდან მეორე დღეს, სახელმწიფო უსაფრთხოების სამსახურმა განცხადება გაავრცელა, სადაც აღნიშნავს, რომ მსგავსი ინფორმაციის ტირაჟირება შეურაცხყოფს ცალკეული ადამიანების, უსაფრთხოების ოფიცრებისა და მთლიანად სამსახურის პატივსა და ღირსებას. უწყებამ მოუწოდა მედიასა და პოლიტიკურად დაინტერესებულ პირებს, გამოძიების დასრულებამდე თავი შეიკავონ არაზუსტი და გადაუმოწმებელი ინფორმაციის გავრცელებისგან.

გაიგეთ მეტი: