პარტია დროას ლიდერის, ელენე ხოშტარიას განცხადებით, დღეს, 15 სექტემბერს სასამართლოში მისი საქმის განხილვაა ჩანიშნული, სადაც მისვლას არ აპირებს. საუბარია TV პირველი ოპერატორის, ლექსო ლაშქარავას გარდაცვალების დღეს მთავრობის კანცელარიასთან გამართულ აქციაზე — სამართალდამცავები ლომჯარიას მთავრობის ადმინისტრაციის შენობაზე წითელი საღებავის შესხმას ედავებიან.

"დღეს იქნება სასამართლო, სადაც საღებავზე მედავებიან ლექსოს სიკვდილის დღეს. არც მისვლას ვაპირებ, ვერც მიმიყვანთ, არც კაპიკს გადავიხდი, არ გაღიარებთ და რომ გასკდეთ ადამიანის მკვლელობაზე პროტესტის გამო ვერაფერს გახდები ჩემთან. ნახვამდის", — წერს ელენე ხოშტარია Facebook-ზე.

TV პირველის ოპერატორის, ლექსო ლაშქარავას გარდაცვალების გამო, პარტია დროას ლიდერმა, ელენე ხოშტარიამ მთავრობის ადმინისტრაციის შენობას წითელი საღებავი შეასხა.

"წარმოუდგენელია ჩვეულებრივად გააგრძელო ცხოვრება და აქ მკვლელები, მოძალადეები იყვნენ მოკალათებულები. წითელ საღებავსაც მიიღებენ, პროტესტსაც მიიღებენ და მოუწევთ ყველაფერზე პასუხისგება. სიტყვები ზედმეტია ამ სიტუაციაში", — განაცხადა ხოშტარიამ.

ალექსანდრე ლაშქარავასა და ჟურნალისტ მირანდა ბაღათურიას ძალადობრივი კონტრაქციის მონაწილეები თავს 5 ივლისს, მოძრაობა სირცხვილიას ოფისში შეჭრის მცდელობისას დაესხნენ. ლაშქარავა 11 ივლისს, დედამ სახლში გარდაცვლილი იპოვა. იგი ერთ-ერთია იმ ათობით მედიის წარმომადგენელს შორის, რომელსაც 5 ივლისს ძალადობრივი კონტრაქციის მონაწილეები ფიზიკურად გაუსწორდნენ. ცემის შედეგად მას ჰქონდა სახის ძვლების მოტეხილობა თვალის გარშემო, ტვინის შერყევა და დაჟეჟილობები. იგი რამდენიმე დღე საავადმყოფოში იმყოფებოდა და 10 ივლისს სახლში გაეწერა.