კარდაშიანების ოჯახის წევრები, ამერიკული პოპკულტურის ყველაზე ცნობადი სახეები, ნებისმიერ სიტუაციაში რომ ახერხებენ, ყურადღების ცენტრში იყვნენ, ამაში უკვე ბევრჯერ დავრწმუნდით.

პოპულარული რეალითი შოუს ერთ-ერთი ვარსკვლავი და ბიზნესმენი, კიმ კარდაშიანი, წლევანდელ Met Gala-ზე დასასწრებად ნიუ-იორკში ბალენსიაგას ექსტრაორდინალურ კოსტიუმში გამოწყობილი ჩავიდა. კიმს თავით-ფეხამდე ტყავის შავი სამოსი ეცვა.

შავი SUV-დან გადმოსვლის შემდეგ გადაღებულ ფოტოებში, რომელიც კარდაშიანმა თავის ინსტაგრამზეც გამოაქვეყნა, ჩანს, რომ მან გრძელ შავ პალტოს ამავე ფერის ხელთათმანები და მაღალყელიანი ფეხსაცმელი შეუხამა. ყველაზე თვალშისაცემი კი მისი ერთგვარი პირბადეა, რომელიც კიმს მთელ სახეს უფარავდა — ერთადერთი "გამოსასვლელი" კოსტიუმს კეფის ადგილას, ცხენის კუდად შეკრული თმისთვის ჰქონდა დატოვებული.

კარდაშიანმა ინსტაგრამზე გამოქვეყნებულ პოსტში ბალენსიაგას ხელმძღვანელი, დემნა გვასალიაც მონიშნა.

აღსანიშნავია, რომ ბალენსიაგას მსგავსი კოსტიუმი კიმს აგვისტოშიც ეცვა ყოფილი ქმრის, კანიე ვესტის, საკონცერტო გამოსვლაზე. ასეთივე სამოსში გამოწყობილი ვიხილეთ სცენაზე ვესტიც.

კიმ კარდაშიანი

ფოტო: kimkardashian / Instagram

კანიე ვესტი

ფოტო: BFA / Yeezy