ყვარელში, საქართველოს ბანკში შეჭრის საქმეზე დაკავებულის ადვოკატის განცხადებით, მისი დაცვის ქვეშ მყოფის მოტივი თიბისი ბანკის იპოთეკური სესხი გახდა. დაკავებული დანაშაულს აღიარებს.

"მოტივი — ფინანსური მდგომარეობა. მას ვალი ჰქონდა თიბისი ბანკის, რის გამოც უყიდიდენ საცხოვრებელ ბინას. ვალი 52 ათას ლარამდე გაეზარდა და აქედან გამომდინარე, მან გადაწყვიტა, რომ ბანკში შესულიყო", — განაცხადა ლეილა გარსევანიშვილმა.

ადვოკატი განმარტავს, საიდან ჰქონდა დაკავებულს ხელყუმბარა.

"მან [ბრალდებულმა] განმარტა, რომ 7 წლის წინ ალაზნის ჭალაში იპოვა ჩანთა, რომელშიც იდო ეს ხელყუმბარა და იყო ასაფეთქებელი ნივთიერებები. როგორც ვიცი და გამიგია ეს ასაფეთქებლები გამოიყენება თევზჭერისათვის", — აცხადებს ადვოკატი.

საქართველოს ბანკზე თავდამსხმელს პროკურატურამ ბრალდება ტერორისტული აქტის, ტერორისტული მიზნით მძევლად ხელში ჩაგდების, ფეთქებადი ნივთიერების და ასაფეთქებელი მოწყობილობის მართლსაწინააღმდეგო შეძენა, შენახვა, ტარების მუხლებით წარუდგინა. აღნიშნული დანაშაულებები 10-დან 15 წლამდე თავისუფლების აღკვეთას ითვალისწინებს.

უწყებაში აცხადებენ, რომ მან ტერორისტული აქტი 500 000 აშშ დოლარის მოთხოვნის მიზნით მოაწყო. მათივე ცნობით, მას ბრალდებულს თან ჰქონდა ასაფეთქებელი ნივთიერება და მძევლად 6 მოქალაქე აიყვანა.