ჯანდაცვის მინისტრის მოადგილის, თამარ გაბუნიას განცხადებით, მსოფლიო ჯანდაცვის ორგანიზაცისთვის კორონავირუსის ახალი მიუ შტამი, დელტა შტამისგან განსხვავებით, არა საგანგაშო, არამედ უფრო ინტერესის საგანია. მისი თქმით, ვირუსის ეს ვარიაცია რამე განსაკუთრებული აგრესიულობით არ ხასიათდება. ამის შესახებ გაბუნიამ Rustavi2–ის ეთერში ისაუბრა.

"დელტა შტამი მაინც მთავარი წუხილის საგნად რჩება. მიუ შტამთან დაკავშირებით, ბევრი ქვეყანა არის ასევე დაკვირვების პროცესში. ჩვენთან არ დაფიქსირებულა ჯერ–ჯერობით ასეთი შემთხვევა, რამე განსაკუთრებულ აგრესიულობას ამ ახალ ვარიაციას ვერ მიაწერენ, თუმცა, რა თქმა უნდა, უნდა დაველოდოთ, რა იქნება მსოფლიო გამოცდილება და ამის მიხედვით, შემდეგ ჩვენც მივიღებთ შესაფერისს ზომებს", — განაცხადა გაბუნიამ.

8 სექტემბერს დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ კორონავირუსის ახალ მიუ შტამთან დაკავშირებით განაცხადა, რომ ის, შესაძლოა, ვირუსის ახალი მუტაცია გახდეს.