თანმხლები დაავადების მქონე ბავშვებში ვაქცინაციასთან დაკავშირებით ჯანდაცვის მინისტრის მოადგილე თამარ გაბუნია ამბობს, რომ პრობლემიდან გამომდინარე, შესაძლოა WHO-ს რეკომენდაციას არ დაელოდონ და აცრაზე გადაწყვეტილება უფრო ადრე მიიღონ.

"მოზარდებში ვაქცინაციის დაწყებასთან დაკავშირებით ვაქცინაციის უწყებათაშორისმა საბჭომ გუშინ იმსჯელა. ვაქცინაციის ექსპერტების ჯგუფი ამ კვირასა და მომდევნო კვირაში კიდევ დამატებით მოიპოვებს იმ მტკიცებულებებს, რაც მოზარდებში ვაქცინაციაზე არსებობს, რაც არის ძირითადად ორი მიმართულებით. ერთი არის ქვეყნები, რომლებიც ყველა მოზარდს 12-15 წლამდე ასაკობრივ ჯგუფში ცრიან, 16 წლიდან მოგეხსენებათ ჩვენც ვიწყებთ აცრებს და მეორე არის ბრიტანული რეკომენდაციები, რომლებიც უპირატესობას ანიჭებს იმ მოზარდების აცრას, რომლებსაც აქვთ რაიმე თანმხლები დაავადება და ითვლება, რომ ამ მოზარდში არის განსაკუთრებით მნიშვნელოვანი ვაქცინაცია", — განაცხადა გაბუნიამ.

ჯანდაცვის მინისტრის მაოდგილე ამბობს, რომ ისინი ამაზე მომდევნო კვირაში იმსჯელებენ და შესაძლებელია ეტაპობრივ მიდგომაზე იყოს საუბარი. მისივე თქმით, უკვე შეიქმნა პრეცედენტები იმისი, რომ გარკვეული პრობლემების მატარებელი მოზარდები 12-დან 16 წლის ასაკობრივ ჯგუფში საქართველოშიც აიცრა.

"ჩვენთვის, რა თქმა უნდა, WHO-ს რეკომენდაციები ყველა შემთხვევაში მნიშვნელოვანია, თუმცა გამომდინარე პრობლემის აქტუალობიდან და იქიდან, თუ რაოდენ დიდი რისკის მატარებელი შეიძლება იყოს კორონავირუსული ინფექცია, იმ მოზარდებში, ვისაც აქვთ რაიმე თანხმლები დაავადება, შეიძლება ამ ჯგუფთან მიმართებით გადაწყვეტილება უფრო ადრე მივიღოთ", — აღნიშნა გაბუნიამ.