სომხეთის პრემიერმინისტრის, ნიკოლ ფაშინიანის განცხადებით, საქართველოს პრემიერმინისტრთან, ირაკლი ღარიბაშვილთან განიხილავს, რა შეიძლება გააკეთონ რეგიონში ერთმანეთის პოტენციალის გაზრდისთვის. ამის შესახებ მან საქართველოს მთავრობის ადმინისტრაციაში გამართულ ერთობლივ ბრიფინგზე ისაუბრა.

"ჩვენ განვიხილეთ, ასევე, ის შესაძლებლობები, რომელიც არსებობს. ეს ეხება არა მხოლოდ ცალკე აღებულ სომხეთს და საქართველოს, ჩვენ განვიხილავთ, რა შეგვიძლია [გავაკეთოთ], რომ რეგიონში ერთმანეთის პოტენციალი უფრო გავზარდოთ. საუბარია ტრანზიტულ გზებზე, პროექტები ხორციელდება ენერგეტიკაში, ტრანსპორტში. ჩვენ განვიხილავთ პროექტებს და შესაძლო გადაწყვეტებიდან ყველაზე შედეგიან ვარიანტს მოვძებნით", — განაცხადა მან.

მისივე თქმით, სომხეთ-საქართველოს ურთიერთობებისთვის მნიშვნელოვანია, რომ ქვეყნებმა თავიანთი ერთგულება გამოხატონ დემოკრატიული ღირებულებების მიმართ. ფაშინიანმა აღნიშნა ისიც, რომ შეხვედრის დიდი ნაწილი კონფლიქტურ რეგიონში ქვეყნების მშვიდობიანი განვითარების სტრატეგიაზე საუბარს დაეთმო და ამ პროცესში ერთმანეთის მხარდაჭერის როლს გაესვა ხაზი.

"ჩვენ ხაზს ვუსვამთ, რომ სამწუხაროდ, ჩვენს რეგიონში არის უამრავი კონფლიქტი და უამრავი საშიშროება. ჩვენ ვცდილობთ, ჩვენს დიალოგში ერთმანეთს დავეხმაროთ და ყურადღება გავამახვილოთ იმ შესაძლებლობებზე, რომლებიც პარალელურად არსებობს. ვფიქრობ, რომ შესაძლებლობების გამოყენების საკითხში ერთმანეთის მხარდაჭერა ის ფორმულაა, რომელიც ჩვენთვის უფრო შესაძლებელს და ხელმისაწვდომს გახდის რისკების მართვას" — აღნიშნავს ფაშინიანი.

პრემიერმინისტრმა ისაუბრა სომხეთ-საქართველოს მრავალსაუკუნოვან მეგობრობაზეც და ირაკლი ღარიბაშვილს მადლობა გადაუხადა სომეხი ტყვეების მშვიდობიანად დაბრუნებაში დახმარებისთვის. ფაშინიანის თქმით, შეხვედრისას მზაობა გამოთქვეს პანდემიის წინააღმდეგ ერთობლივი ბრძოლისთვისაც.

ნიკოლ ფაშინიანი საქართველოს დღეს, 8 სექტემბერს ოფიციალური ვიზიტით ეწვია. მთავრობის ადმინისტრაციის ინფორმაციით, ფაშინიანი შეხვედრას პრეზიდენტ სალომე ზურაბიშვილთანაც გამართავს.