თბილისის საკრებულოს გადაწყვეტილებით, მთაწმინდის რაიონში, კოტე მესხის შესახვევს კინორეჟისორის, სერგო ფარაჯანოვის ქუჩა ეწოდება. მერიამ ცვლილებისთვის საჭირო ღონისძიებები 4 თვის ვადაში უნდა განახორციელოს.

სერგო ფარაჯანოვი მთაწმინდაზე სწორედ კოტე მესხის ქუჩაზე ცხოვრობდა, ხოლო სახლში დაბრუნებისას იმ შესახვევს გაივლიდა, რომელსაც მისი სახელი მიენიჭება.

ფარაჯანოვის შვილმა მოგვიანებით მთაწმინდაზე მდებარე ბინა გაყიდა და იქ ახლა დიდი რეჟისორის სახელობის სასტუმრო მდებარეობს.

სწორედ ამ ქუჩის მახლობლადაა გადაღებული ფარაჯანოვის ცნობილი ფოტო, სახელად შავი ყვავის აფრენა, რომლის გადაღების ისტორიაც ფოტოგრაფმა იური მეჩითოვმა ცოტა ხნის წინ გაიხსენა:

"ჩვენ ჩავყევით არსენას ქუჩას და შევუხვიეთ თხინვალის ქუჩაზე. მე ვფიქრობ ფარაჯანოვი ამ ჩანაფიქრს დიდ ხანს ატარებდა. აი აქედან ყველაზე კარგი ხედია მთაწმინდაზე და კარგი კადრი გამოვა - თქვა სერგომ და მიმითითა ადგილი, საიდანაც უნდა გადამეღო მომავალი შედევრი. ფარაჯანოვმა დააყენა ქალბატონები მოშორებით, თავისი ადგილიც მოძებნა და მიბრძანა გადამეღო. ვიღებდი უბრალო ზენიტით. მან გასაოცარი სიმსუბუქით ჰაერში ახტა, შემდეგ მეორედ... მესამე დუბლი აღმოჩნდა ყველაზე საუკეთესო. ფარაჯანოვმა ამ კადრს საუკუნის კადრი უწოდა და კოლაჟიც დაამზადა. მე კი შავი ყვავის აფრენა დავარქვი. თბილისი, 1981 წ. 15 მაისი".

სერგო ფარაჯანოვი XX საუკუნის ერთ-ერთი ყველაზე მნიშვნელოვანი საბჭოთა კინოხელოვანია, რომელიც თბილისში დაიბადა და გაიზარდა. მან თავისი ისეთი ცნობილი კინოსურათებით, როგორებიცაა აშუღი ქერიბი, ბროწეულის ფერი თუ მივიწყებულ წინაპართა აჩრდილები, შემდგომში უამრავ ხელოვანზე მოახდინა უდიდესი გავლენა.

ასევე იხილეთ: