თბილისის მერის, კახა კალაძის განცხადებით, მერია წარმატებული სოციალურად დაუცველი სტუდენტების დაფინანსებაზე განცხადებებს 10 სექტემბრიდან მიიღებს. მისი თქმით, განცხადებების მიღება 30 ოქტომბრამდე გაგრძელდება.

"2021 წლამდე ფინანსდებოდნენ თბილისში რეგისტრირებული ბაკალავრიატის, მაგისტრატურისა და დოქტორანტურის საფეხურის სტუდენტები, რომელთა ოჯახების სოციალური ქულა 70 000 ან ნაკლები იყო, ცვლილებების შედეგად კი, დღეს ფინანსდებიან თბილისში რეგისტრირებული ის სტუდენტები, რომელთა ოჯახების სოციალური ქულა 150 000 ან ნაკლებია", — განაცხადა მან.

კალაძის თქმით, 2021 წლის გაზაფხულის სემესტრში ცვლილებების შედეგად, 1 400-მდე სტუდენტი დაფინანსდა. მისივე განცხადებით, გასაცემი დაფინანსება, რომლის მაქსიმალური ოდენობა წლიურად 2 250, ხოლო სემესტრულად 1 125 ლარია, დამოკიდებულია სტუდენტის მიერ წინა სემესტრში მიღებულ აკადემიურ მოსწრებაზე, ხოლო დაფინანსებისთვის თანხა სემესტრულად, წელიწადში ორჯერ გაიცემა.