ტურიზმის ეროვნული ადმინისტრაციის ინფორმაციით, აგვისტოში საქართველოში 266 544 უცხოური ვიზიტი განხორციელდა, რაც პანდემიის პერიოდისთვის ყველაზე მაღალი მაჩვენებელია. უნდა აღინიშნოს, რომ აგვისტოს თვეში განხორციელებული ვიზიტების რაოდენობა, გასული წლის იმავე პერიოდთან შედარებით, 510%-ით არის გაზრდილი, თუმცა 2019 წლის იმავე თვის მონაცემს 75,5%-ით ჩამორჩება.

ეს ნიშნავს იმას, რომ პანდემიამდელ პერიოდთან შედარებით სეზონის ყველაზე მნიშვნელოვან თვეს ტურიზმი მხოლოდ 24,5%-ით აღდგა.

ასეთია იმ ქვეყნების ჩამონათვალი, რომელთა მოქალაქეებმაც აგვისტოში ყველაზე მეტი უცხოური ვიზიტი განახორციელეს:

  1. რუსეთი — 39 909 ვიზიტი; გასული წლის აგვისტოსთან შედარებით ზრდა — 809,1%;
  2. თურქეთი — 34 847 ვიზიტი; ზრდა — 113,6%;
  3. უკრაინა — 29 372 ვიზიტი; ზრდა — 2 849%;
  4. საქართველო (არარეზიდენტი) — 23 117 ვიზიტი; ზრდა — 389,6%;
  5. სომხეთი — 22 733 ვიზიტი; ზრდა — 160,7%;
  6. საუდის არაბეთი — 16 436 ვიზიტი; ზრდა — 1 643 500%;
  7. ბელარუსი — 13 494 ვიზიტი; (გასული წლის აგვისტოში ამ ქვეყნის მოქალაქე საქართველოში არ შემოსულა);
  8. ყაზახეთი — 12 221 ვიზიტი; ზრდა — 2 489,2%;
  9. აზერბაიჯანი — 11 181 ვიზიტი; ზრდა — 197,6%;
  10. პოლონეთი — 6 954 ვიზიტი; ზრდა — 12 100%.

რაც შეეხება მიმდინარე წლის პირველი რვა თვის მაჩვენებლებს, როგორც საზღვრის კვეთის მონაცემებიდან ხდება ცნობილი, 2021 წლის იანვარ-აგვისტოში საქართველოში სულ 961 572 უცხოური ვიზიტი განხორციელდა, რაც გასული წლის იმავე პერიოდის მაჩვენებელს 27,1%-ით, ხოლო 2019 წლის იანვარ-აგვისტოს მონაცემს 81,5%-ით ჩამორჩება.

ამ დროისათვის ტურიზმიდან მიღებული შემოსავლების აგვისტოს თვის მონაცემები არ არის ცნობილი. ეროვნული ბანკის შეფასებით, მიმდინარე წლის იანვარ-ივლისში უცხოური ტურიზმიდან 505,1 მილიონი აშშ დოლარი მივიღეთ, რაც გასული წლის იმავე პერიოდის მაჩვენებელს 7,8%-ით აღემატება — 2020 წლის პირველ შვიდ თვეში ტურიზმიდან ქვეყანაში 468,6 მილიონი დოლარი შემოვიდა.

აღსანიშნავია, რომ ბოლო თვეების განმავლობაში როგორც ვიზიტების, ასევე ამ ვიზიტებიდან მიღებული შემოსავლების მატება შეინიშნება, თუმცა არსებული სტატისტიკით, ტურიზმის მაჩვენებლები პანდემიამდელ მონაცემებს მნიშვნელოვნად ჩამორჩება.

გაიგეთ მეტი: